హనుమకొండ:

జిల్లాలో ఉపాధి హామీ పనులను వేగవంతం చేసి ఈ నెల 31లోపు పూర్తి చేయాలని జిల్లా కలెక్టర్ చాహత్ బాజ్ పాయి అధికారులను ఆదేశించారు. గురువారం జిల్లా కలెక్టరేట్‌లోని మినీ కాన్ఫరెన్స్ హాల్ నుండి ఎంపీడీవోలు, ఎంపీవోలు, పంచాయతీ కార్యదర్శులతో వీడియో కాన్ఫరెన్స్ నిర్వహించి వివిధ అభివృద్ధి కార్యక్రమాలపై సమీక్షించారు.

ఈ సమావేశంలో డీఆర్‌డీవో మేన శ్రీను, డీపీవో లక్ష్మీ రమాకాంత్, పంచాయతీరాజ్ ఈఈ సైదుల్ రెడ్డి, గృహ నిర్మాణ శాఖ పీడీ సిద్దార్థ నాయక్ తదితర అధికారులు పాల్గొన్నారు.

కలెక్టర్ మాట్లాడుతూ, గ్రామపంచాయతీల వారీగా ఉపాధి హామీ పనుల పెండింగ్‌పై ఎంపీడీవోలు సమీక్ష చేయాలని సూచించారు. పల్లె ప్రకృతి వనాల్లో మొక్కల పెంపకానికి ప్రత్యేక శ్రద్ధ తీసుకోవాలని అన్నారు. అలాగే జిల్లాలోని అన్ని గ్రామపంచాయతీలలో వందశాతం ఇంటి పన్నుల వసూలు సాధించాలని ఆదేశించారు.

పన్నుల వసూళ్లలో 50 శాతం కంటే తక్కువ ఉన్న గ్రామాల్లో పంచాయతీ కార్యదర్శులకు నోటీసులు జారీ చేయాలని డీపీవోను ఆదేశించారు. ఎంపీవోలు వారంలో నాలుగు రోజులు క్షేత్రస్థాయిలో పర్యవేక్షణ చేయాలని సూచించారు.

గ్రామాలలో పరిశుభ్రతపై ప్రత్యేక దృష్టి పెట్టాలని, చెత్తను తడి-పొడి వేరు చేసి వందశాతం సెగ్రిగేషన్ చేయాలని ఆదేశించారు. ప్రతి మండలంలో కనీసం రెండు గ్రామపంచాయతీలను ఆదర్శంగా అభివృద్ధి చేయాలని పేర్కొన్నారు.

పంచాయతీ కార్యదర్శులు ఉదయం 9 గంటలకు విధుల్లో హాజరు కావాలని, తాగునీటి సరఫరాలో ఎలాంటి ఇబ్బందులు తలెత్తకుండా చర్యలు తీసుకోవాలని సూచించారు. అలాగే పూర్తి అయిన ఇందిరమ్మ ఇండ్లలో గృహప్రవేశాలు నిర్వహించేలా చర్యలు చేపట్టాలని తెలిపారు.

ఈ సమావేశంలో డీఎల్పివోలు రవిబాబు, గంగభవాని సహా ఇతర అధికారులు పాల్గొన్నారు.