బాధ్యతను మించిన మానవత్వం.. ఆపదలో అండగా నిలిచిన పర్వతగిరి సీఐ రాజగోపాల్..:
వరంగల్ నగర పరిధిలో జరిగిన రోడ్డు ప్రమాదంలో గాయపడిన దంపతులకు సకాలంలో సహాయం చేసి పర్వతగిరి సీఐ రాజగోపాల్ మానవత్వాన్ని చాటుకున్నారు. విధులకు వెళ్తున్న సమయంలో జేఎస్ఎం కళాశాల సమీపంలో కారు, స్కూటీ ఢీకొన్న ప్రమాదాన్ని ఆయన గమనించారు. ప్రమాదంలో స్కూటీపై ప్రయాణిస్తున్న దంపతులు తీవ్రంగా గాయపడి రోడ్డుపై పడివుండగా, పరిస్థితిని చూసిన సీఐ వెంటనే స్పందించారు.
చుట్టుపక్కల వారు గుమికూడినప్పటికీ, గాయపడిన వారిని ఆస్పత్రికి తరలించేందుకు ఆలస్యం జరుగుతున్నట్లు గుర్తించిన రాజగోపాల్ స్వయంగా చర్యలు చేపట్టారు. వెంటనే ఒక ఆటోను ఏర్పాటు చేసి, గాయపడిన వ్యక్తిని అందులో ఎక్కించి ఆస్పత్రికి తరలించే ఏర్పాట్లు చేశారు. అంతటితో ఆగకుండా, తానే ఆటోలో వెళ్లి బాధితులతో పాటు హంటర్ రోడ్డులోని మెడికవర్ ఆస్పత్రికి చేరుకున్నారు.
ఆస్పత్రిలో వైద్యులతో మాట్లాడి బాధితులకు తక్షణ చికిత్స అందేలా చర్యలు తీసుకున్నారు. ప్రమాదంతో భయాందోళనలకు గురైన దంపతులకు ధైర్యం చెప్పి, అవసరమైన సహకారం అందించారు. సీఐ చూపిన చొరవ కారణంగా బాధితులకు సకాలంలో వైద్య సహాయం అందిందని స్థానికులు పేర్కొన్నారు.
ఉరుకుల పరుగుల యాంత్రిక జీవనంలో రోడ్డుపై ప్రమాదం జరిగితే చూసీచూడనట్లు వెళ్లిపోయే ఈ రోజుల్లో.. ప్రమాదంలో ఉన్న అపరిచితుల ప్రాణాలను కాపాడేందుకు రాజగోపాల్ చూపిన స్పందన అందరి ప్రశంసలను అందుకుంటోంది. పోలీసు విధులతో పాటు మానవతా విలువలను కూడా సమానంగా పాటిస్తూ ఆయన చేసిన సేవ ప్రజల్లో సానుకూల చర్చకు దారితీసింది. సీఐ రాజగోపాల్ వ్యవహరించిన తీరు యువతకు ఆదర్శంగా నిలుస్తుందని స్థానికులు ప్రశంసిస్తున్నారు.
Read Warangal News and Latest Politics News and Real Estate