ముఖ్యమంత్రి ఎ. రేవంత్ రెడ్డి గారు మహబూబ్‌నగర్ జిల్లాలో విద్యా అభివృద్ధికి మరో మైలురాయిని అందించారు.

జడ్చర్ల మండలం చిట్టబోయినపల్లిలో రాజీవ్ గాంధీ వైజ్ఞానిక సాంకేతిక విశ్వవిద్యాలయం (IIIT) నిర్మాణానికి భూమిపూజ చేశారు.

ఈ కార్యక్రమంలో పాల్గొన్న అనంతరం విద్యార్థులతో ముఖాముఖి సంభాషణ జరిపి, వారికి స్ఫూర్తినిచ్చేలా మాట్లాడారు.

విద్యే ఉజ్వల భవిష్యత్తుకు కీలకం

“లక్ష్యం ఉన్నతంగా ఉండాలి. అందుకు కష్టపడే తత్వాన్ని అలవర్చుకోవాలి. భాషను, జ్ఞానాన్ని పెంచుకోవడానికి చిత్తశుద్ధితో పనిచేయాలి.

మీలోని నిబద్ధత, క్రమశిక్షణతో కూడిన విద్య మిమ్మల్ని సమాజంలో ఉన్నత స్థానంలో నిలబెడుతుంది” అని విద్యార్థినీ విద్యార్థులకు ఉద్బోధించారు.

ప్రభుత్వం విద్యారంగాన్ని అభివృద్ధి చేయడాన్ని తన టాప్ ప్రాధాన్యతగా పెట్టుకుందని స్పష్టం చేశారు.

ప్రతి నియోజకవర్గంలో అడ్వాన్స్డ్ టెక్నాలజీ సెంటర్లు (ATC) ఏర్పాటు చేస్తున్నామని, మహబూబ్‌నగర్ జిల్లాలో IIITతో పాటు ఇంజినీరింగ్, లా, మెడికల్ కళాశాలలు స్థాపిస్తున్నామని వెల్లడించారు.

UPSC (సివిల్స్) పరీక్షల్లో మెయిన్స్, ఇంటర్వ్యూకు ఎంపికైన యువతకు ఆర్థిక సహాయం అందిస్తున్నట్లు తెలిపారు.

ఇవన్నీ ప్రపంచంతో పోటీపడేందుకు, గ్లోబల్ స్థాయిలో తెలంగాణను ముందుకు తీసుకెళ్లే ఉద్దేశంతో చేస్తున్నామని చెప్పారు.

తల్లిదండ్రులు, ఊరిని మరవకండి

ఎంత ఎదిగినా తల్లిదండ్రులను, పుట్టిన ఊరిని మరవకూడదని సూచించారు. “మీ భవిష్యత్తు చదువుపైనే ఆధారపడి ఉంది.

25 ఏళ్ల వరకు కష్టపడి చదువుకోండి. చదువు మీకు సమాజంలో గౌరవాన్ని, గౌరవప్రదమైన జీవితాన్ని తెచ్చిపెడుతుంది.

దేశంలో ఏ మూలకు వెళ్లినా తెలంగాణకు గుర్తింపు, గౌరవం తీసుకురావాలి. లక్ష్యాన్ని సాధించి సమాజానికి ఆదర్శంగా నిలవాలి” అని సలహా ఇచ్చారు.

విద్యే ఏకైక ఆస్తి

స్వాతంత్య్రం తర్వాత జమీందార్లు, జాగీర్దార్ల భూములను తీసుకుని పేదలకు పంచారని గుర్తుచేశారు.

కానీ ఇప్పుడు భూములు పంచడం కష్టమైంది. ఇళ్ల పట్టాలు ఇవ్వడమే గొప్ప కష్టమైన పనిగా మారిందని వివరించారు.

“ప్రభుత్వం ఇవ్వగలిగింది విద్య మాత్రమే. విద్య ఒక్కటే మీ జీవితాన్ని మార్చగలదు. అభివృద్ధి చెందిన పౌరులుగా నిలబడగలుగుతారు.

అందుకే విద్యారంగానికి అత్యధిక ప్రాధాన్యత ఇస్తున్నాం” అని భావోద్వేగంతో చెప్పారు.

మహబూబ్‌నగర్ జిల్లా నుంచి బూర్గుల రామకృష్ణారావు గారు రాష్ట్ర తొలి ముఖ్యమంత్రిగా పనిచేశారని, 75 ఏళ్ల తర్వాత మళ్లీ జిల్లాకు అవకాశం వచ్చిందని గర్వంగా తెలిపారు.

తన రాజకీయ ప్రస్థానాన్ని వివరిస్తూ, పెద్దల సహకారంతో ముఖ్యమంత్రి అయ్యే అవకాశం లభించిందని చెప్పారు.

ఈ IIIT భవన నిర్మాణాన్ని ఏడాది కాలంలో పూర్తి చేస్తామని హామీ ఇచ్చారు.

ఈ కార్యక్రమంలో మంత్రులు దామోదర రాజనరసింహ, జూపల్లి కృష్ణారావు, వాకిటి శ్రీహరి, ప్రణాళికా సంఘం ఉపాధ్యక్షుడు చిన్నారెడ్డి, ఎంపీలు మల్లు రవి, డీకే అరుణ, జిల్లా ప్రజాప్రతినిధులు, అధికారులు పాల్గొన్నారు.

విద్యార్థులు తొణుకు-బెనుకు లేకుండా అద్భుతంగా మాట్లాడినందుకు ముఖ్యమంత్రి ప్రశంసించారు. ఉజ్వల భవిష్యత్తు కోసం ఎదురుచూస్తున్న అందరికీ శుభాకాంక్షలు తెలియజేశారు.

ఈ భూమిపూజతో మహబూబ్‌నగర్ జిల్లా విద్యా హబ్‌గా మారే దిశగా మరో అడుగు వేయబడింది!