సరస్వతి అంత్య పుష్కరాలు తెలంగాణలోని ప్రముఖ పుణ్యక్షేత్రం కాళేశ్వరంలో ఆధ్యాత్మిక వైభవంగా కొనసాగుతున్నాయి. పుష్కరాల ఆరవ రోజున త్రివేణి సంగమం వద్ద భక్తుల రద్దీ మరింత పెరిగింది. తెలంగాణ, ఆంధ్రప్రదేశ్‌తో పాటు మహారాష్ట్ర, ఛత్తీస్‌గఢ్ రాష్ట్రాల నుంచి కూడా వేలాదిగా భక్తులు తరలివస్తున్నారు.
ఉదయం నుంచి భక్తులు గోదావరి, ప్రాణహిత, సరస్వతి నదుల త్రివేణి సంగమంలో పవిత్ర స్నానాలను ఆచరించారు.
సరస్వతి అంత్య పుష్కరాల్లో ప్రత్యేక పూజలు
పుణ్యస్నాల అనంతరం సైకత లింగాలను ఏర్పాటు చేసి ప్రత్యేక పూజలు నిర్వహించారు. దంపతులు కలిసి పుష్కర స్నానాలు చేయడంతో పాటు పితృ తర్పణాలు, పిండ ప్రధాన కార్యక్రమాలు భక్తిశ్రద్ధలతో నిర్వహించారు. నదిలో దీపాలను వదులుతూ భక్తులు ఆధ్యాత్మిక ఆనందంలో మునిగిపోయారు.
అనంతరం భక్తులు ప్రముఖ పుణ్యక్షేత్రమైన శ్రీ కాళేశ్వర ముక్తీశ్వర స్వామి ఆలయాన్ని దర్శించుకుని ప్రత్యేక పూజలు నిర్వహించారు. అలాగే శ్రీ శుభానంద దేవి, శ్రీ సరస్వతి దేవి అమ్మవార్లను దర్శించుకుని మొక్కులు చెల్లించుకున్నారు.
కాళేశ్వరంలో ప్రత్యేక ఏర్పాట్లు
సరస్వతి అంత్య పుష్కరాలు సందర్భంగా భక్తులకు ఎలాంటి ఇబ్బందులు కలగకుండా ఆలయ అధికారులు, పోలీసు శాఖ, వివిధ ప్రభుత్వ విభాగాలు ప్రత్యేక ఏర్పాట్లు చేపట్టాయి. ఆలయ పరిసరాలు భక్తుల రద్దీతో కళకళలాడుతున్నాయి.
పుష్కరాల సందర్భంగా కాళేశ్వరం ఆధ్యాత్మిక కాంతులతో మరింత ప్రత్యేక ఆకర్షణగా మారింది.
Read Warangal News and Latest Politics News and Real Estate