వరంగల్‌లో కట్టుదిట్టమైన నాకా బందీ.. అనుమానితులపై నిఘా:

నేరాల నియంత్రణతో పాటు పాత నేరస్తుల కదలికలను గుర్తించేందుకు వరంగల్ పోలీస్ కమిషనరేట్ పరిధిలో ప్రత్యేక నాకా బందీ తనిఖీలు నిర్వహించినట్లు సన్ ప్రీత్ సింగ్ తెలిపారు. కమిషనరేట్ పరిధిలోని వివిధ ప్రాంతాల్లో పోలీసులు చేపట్టిన ఈ తనిఖీల్లో మొత్తం 11286 వాహనాలను పరిశీలించినట్లు వెల్లడించారు.

జోన్ల వారీగా తనిఖీలు:

సెంట్రల్ జోన్ పరిధిలో 5626 వాహనాలు, ఈస్ట్ జోన్ లో 2591 వాహనాలు, వెస్ట్ జోన్లో 57 వాహనాలు, ట్రాఫిక్ విభాగం పరిధిలో 992 వాహనాలను తనిఖీ చేసినట్లు అధికారులు తెలిపారు. నిబంధనలను ఉల్లంఘించినందుకు వివిధ కారణాలతో మొత్తం 275 వాహనాలను పోలీసులు సీజ్ చేశారు.

డ్రంక్ అండ్ డ్రైవ్ లో 197 మంది పట్టివేత:

నాకా బందీ తనిఖీల్లో భాగంగా నిర్వహించిన డ్రంక్ అండ్ డ్రైవ్ తనిఖీల్లో 197 మంది మద్యం సేవించి వాహనాలు నడుపుతూ పట్టుబడ్డారు. ట్రాఫిక్ నిబంధనలను ఉల్లంఘించే వారిపై కఠిన చర్యలు కొనసాగుతాయని పోలీసులు హెచ్చరించారు.

అక్రమ రవాణా పై కేసులు నమోదు :

శాయంపేట పోలీస్ స్టేషన్ పరిధిలో అక్రమంగా ఇసుక తరలిస్తున్న ట్రాక్టర్ల పై రెండు కేసులు నమోదు చేసినట్లు తెలిపారు. అలాగే దామోర పోలీస్ స్టేషన్ పరిధిలో అక్రమ మద్యం తరలిస్తున్న వారిపై మరో రెండు కేసులు నమోదు చేశారు. ఇంతేజర్ గంజి పోలీస్ స్టేషన్ పరిధిలో అనుమానాస్పదంగా సంచరిస్తున్న ఒక వ్యక్తిని అదుపులోకి తీసుకున్నట్లు పోలీసులు వెల్లడించారు.

నేర నియంత్రణకు ప్రత్యేక చర్యలు:

ప్రజల భద్రత కోసం ఇలాంటి నాకాబందీ తనిఖీలు నిరంతరం కొనసాగుతాయని పోలీస్ కమిషనర్ తెలిపారు. నేరాల నియంత్రణ, అనుమానితుల గుర్తింపు, ట్రాఫిక్ నిబంధనల అమలు విషయంలో ఎలాంటి రాజీ ఉండదని స్పష్టం చేశారు.

Read Warangal News and Latest Politics News and Real Estate