న్యూ ఢిల్లీ | 14-03-2026

వరంగల్ పార్లమెంట్ సభ్యురాలు డా. కడియం కావ్య చేసిన వినతికి కేంద్ర ప్రభుత్వం స్పందించింది. తెలంగాణలో ధాన్యం (ప్యాడి), పత్తి వంటి వ్యవసాయ ఉత్పత్తుల రవాణాకు అవసరమైన “రైల్వే రేక్స్”ను సమృద్ధిగా కేటాయించేందుకు కేంద్ర రైల్వే శాఖ హామీ ఇచ్చింది.

ఈ మేరకు కేంద్ర రైల్వే శాఖ సహాయ మంత్రి రవ్‌నీత్ సింగ్ బిట్టు వరంగల్ ఎంపీ డా. కడియం కావ్యకు లేఖ రాశారు. లోక్‌సభలో రూల్ 377 కింద 2025 డిసెంబర్ 9న ఎంపీ కడియం కావ్య ఈ అంశాన్ని ప్రస్తావించారు. తెలంగాణలో ధాన్యం, పత్తి వంటి వ్యవసాయ ఉత్పత్తుల రవాణా సులభతరం కావడానికి అదనపు రైల్వే రేక్స్ కేటాయించాలని కేంద్రాన్ని కోరారు.

దీనిపై స్పందించిన మంత్రి, రాష్ట్ర ప్రభుత్వాలు మరియు భారత ఆహార సంస్థ సమర్పించే అవసరాల ఆధారంగా ఆహార ధాన్యాలు మరియు ఇతర వ్యవసాయ ఉత్పత్తుల రవాణాకు రైల్వే రేక్స్ కేటాయిస్తున్నామని తెలిపారు. ప్రతిరోజూ అవసరాలు, రైల్వే బోగీల లభ్యత, రైల్వే మార్గాల సామర్థ్యం, నిర్వహణ పరిస్థితులను పరిగణనలోకి తీసుకుని కేటాయింపులు జరుగుతాయని వివరించారు.

ప్రస్తుత ఆర్థిక సంవత్సరంలో 2026 జనవరి వరకు తెలంగాణలో భారత ఆహార సంస్థ ద్వారా సుమారు 3.59 మిలియన్ టన్నుల ధాన్యం (సుమారు 1,329 రైల్వే రేక్స్) లోడింగ్ జరిగినట్లు మంత్రి వెల్లడించారు. ధాన్యం సహా ఆహార ధాన్యాల రవాణా నిరంతరంగా సాగేందుకు రోజువారీగా రైల్వే రేక్స్ అందిస్తున్నామని తెలిపారు.

రైతుల పంటల రవాణా సులభతరం కావడానికి కేంద్రం తీసుకుంటున్న ఈ చర్యలు ఉపయోగపడతాయని వరంగల్ ఎంపీ డా. కడియం కావ్య పేర్కొన్నారు.