వరంగల్ తేదీ: 22-01-2026
ప్రాంతీయ వ్యవసాయ పరిశోధన కేంద్రాన్ని సందర్శించిన వరంగల్ ఎంపీ డా. కడియం కావ్య
వరంగల్ ప్రాంతీయ వ్యవసాయ పరిశోధన కేంద్రాన్ని గురువారం వరంగల్ లోక్‌సభ సభ్యురాలు డాక్టర్ కడియం కావ్య సందర్శించారు.
ఈ సందర్భంగా ఆమె అక్కడి శాస్త్రవేత్తలతో సమావేశమై, వ్యవసాయ రంగంలో జరుగుతున్న పరిశోధనల పురోగతి, రైతులకు అందుబాటులో ఉన్న సాంకేతిక సహాయం, కొత్త పంటల అభివృద్ధి వంటి అంశాలపై వివరంగా చర్చించారు.
ముఖ్యంగా పత్తి, వరి వంటి ప్రధాన పంటల సాగు విధానాలు, రైతులకు లాభదాయకంగా ఉండేలా అనుసరించాల్సిన పద్ధతుల గురించి శాస్త్రవేత్తల నుంచి సమాచారం సేకరించారు.
ఈ సందర్భంగా మాట్లాడిన వరంగల్ ఎంపీ డా. కడియం కావ్య మాట్లాడుతూ, ఈ ప్రాంత రైతుల అవసరాలకు తగినట్లుగా పరిశోధనలను మరింత ఉపయోగకరంగా రూపొందించాలని, శాస్త్రవేత్తలు-రైతుల మధ్య సంబంధాలను మరింత బలపరచాలని సూచించారు.
వ్యవసాయ రంగం బలోపేతం కావాలంటే పరిశోధన ఫలితాలు నేరుగా రైతుల చేతికి అందాలని ఆమె పేర్కొన్నారు. అలాగే వరంగల్ టెక్స్‌టైల్ రంగానికి అనుసంధానంగా స్థానికంగా పండించిన పత్తిని సమర్థవంతంగా వినియోగించేలా ప్రత్యేక చర్యలు తీసుకోవాలని ఆమె అభిప్రాయపడ్డారు.
ఉద్యాన పంటలైన మిరప, మామిడి, పసుపు, పత్తి వంటి పంటలపై పరిశోధనలు వరంగల్ ప్రాంతంలోనే జరిగేలా ప్రతిపాదనలు సిద్ధం చేస్తే, వాటిని కేంద్ర ప్రభుత్వ దృష్టికి తీసుకెళ్లి అమలు చేయించేందుకు కృషి చేస్తానని ఎంపీ స్పష్టం చేశారు.
రాష్ట్రంలో పండుతున్న పత్తి, వరి అవశేషాలను తగలబెట్టకుండా, నేలలోనే కుళ్లబెట్టి సేంద్రియ ఎరువుగా మార్చే విధంగా షెడ్డర్లు, మల్చర్లను రైతులకు అందుబాటులోకి తీసుకొచ్చేలా చర్యలు తీసుకుంటానని ఆమె తెలిపారు.
అనంతరం డా. కడియం కావ్య అక్కడ జరుగుతున్న వివిధ పంటల పరిశోధనలను స్వయంగా పరిశీలించారు.
ఈ కార్యక్రమంలో అసోసియేట్ డైరెక్టర్ ఆఫ్ రీసెర్చ్ ఉమా రెడ్డి, అగ్రికల్చర్ కాలేజీ ప్రిన్సిపల్ రవీందర్ నాయక్, వివిధ శాస్త్రవేత్తలు, మాజీ కార్పొరేటర్ మాధవి తదితరులు పాల్గొన్నారు.