మహిళల భద్రతే పోలీసుల ప్రధాన లక్ష్యం: వరంగల్ సీపీ సన్ ప్రీత్ సింగ్:
వరంగల్ పోలీస్ కమిషనర్ సన్ ప్రీత్ సింగ్ మహిళల భద్రతకు అత్యంత ప్రాధాన్యత ఇస్తూ పోలీసు శాఖ నిరంతరం పనిచేస్తుందని తెలిపారు. ప్రజా పాలన-ప్రగతి ప్రణాళికలో భాగంగా నిర్వహిస్తున్న 99 రోజుల కార్యాచరణ కార్యక్రమంలో భాగంగా శనివారం ధర్మసాగర్ మండలం పెండ్యాల గ్రామంలో రెవెన్యూ పోలీసు శాఖ ఆధ్వర్యంలో గ్రామసభ నిర్వహించారు. ఈ కార్యక్రమానికి ముఖ్యఅతిథిగా హాజరైన సీపీ.. గ్రామస్తులను ఉద్దేశించి మాట్లాడారు.
“మహిళలు అన్ని రంగాలలో విశేష ప్రతిభ కనబరుస్తున్న ఈ సమయంలో ఆత్మవిశ్వాసంతో ముందుకు సాగాలని ఆయన సూచించారు. మహిళల అభివృద్ధి, భద్రత కోసం ప్రత్యేకంగా షీ టీమ్స్ పనిచేస్తున్నాయని పేర్కొన్నారు . ఎలాంటి వేధింపులు ఎదురైనా మౌనంగా ఉండకుండా వెంటనే పోలీసులకు సమాచారం అందించాలని మహిళలకు సూచించారు. మహిళలు తమ పిల్లలకు నాణ్యమైన విద్య అందించి ఉన్నత లక్ష్యాల సాధనకు ప్రోత్సహించాలని చెప్పారు. కుటుంబం, సమాజ అభివృద్ధిలో మహిళల పాత్ర ఎంతో కీలకమని ఆయన అన్నారు.
అదేవిధంగా రోడ్డు ప్రమాదాల నివారణ పై కూడా సీపీ అవగాహన కల్పించారు. ప్రతి వాహనా దారుడు ట్రాఫిక్ నిబంధనలను తప్పనిసరిగా పాటించాలని.. బాధ్యతాయుతంగా వాహనాలు నడపడం ద్వారా ప్రమాదాలు గణనీయంగా తగ్గించవచ్చు అని తెలిపారు. ప్రజల సహకారంతో సురక్షిత సమాజ నిర్మాణం సాధ్యమవుతుందని ఆయన పేర్కొన్నారు.
ఈ గ్రామ సభలో సెంట్రల్ జోన్ డీసీపీ దారా కవిత, కాజీపేట ఏసీపీ ప్రశాంత్ రెడ్డి, ధర్మసాగర్ ఇన్‌స్పెక్టర్ శ్రీధర్ రావు, స్థానిక ప్రజాప్రతినిధులు, రెవెన్యూ అధికారులు మరియు గ్రామస్తులు పాల్గొన్నారు. కార్యక్రమంలో మహిళల భద్రత, విద్య, ట్రాఫిక్ అవగాహన వంటి అంశాలపై విస్తృతంగా చర్చించారు.
