కాజీపేట: పట్టపగలే చైన్ స్నాచర్లు రెచ్చిపోయారు. బాపూజీ నగర్ లాంటి రద్దీ ప్రాంతంలో మహిళ మెడలో నుండి బంగారు గొలుసును లాక్కొని పరారైన ఘటన స్థానికంగా తీవ్ర కలకలం రేపింది.

స్థానిక బాపూజీ నగర్‌లో నివసించే ధనలక్ష్మి అనే మహిళ తన పని ముగించుకుని కారుణ్య క్లీనిక్ సమీపం గుండా ఇంటికి వెళ్తోంది. సరిగ్గా అదే సమయంలో బైక్‌పై వచ్చిన గుర్తు తెలియని ఇద్దరు దుండగులు మెరుపు వేగంతో ఆమెపై దాడి చేశారు. ఆమె మెడలో ఉన్న సుమారు మూడు తులాల బంగారు గొలుసును బలంగా లాక్కొని, క్షణాల్లో అక్కడి నుండి పరారయ్యారు.

బాధిత మహిళ కేకలు వేయడంతో స్థానికులు అక్కడికి చేరుకున్నారు. సమాచారం అందుకున్న కాజీపేట పోలీసులు వెంటనే సంఘటనా స్థలానికి చేరుకుని వివరాలు సేకరించారు. దుండగులను గుర్తించేందుకు పోలీసులు ఆ ప్రాంతంలోని CCTV ఫుటేజీలను పరిశీలిస్తున్నారు. బాపూజీ నగర్ మరియు పరిసర ప్రాంతాల్లో నాకాబందీ నిర్వహించి గాలింపు చర్యలు చేపట్టారు.

​ఈ దారుణ ఘటనతో బాపూజీ నగర్ వాసులు ఒక్కసారిగా భయాందోళనకు గురయ్యారు. జన సంచారం ఉండే ప్రాంతంలోనే ఇలాంటి ఘటన జరగడంపై ఆందోళన వ్యక్తం చేస్తున్నారు. పోలీసులు కేసు నమోదు చేసి దర్యాప్తు ముమ్మరం చేశారు.