తెలంగాణ ముఖ్యమంత్రి రేవంత్ రెడ్డి రైతు సంక్షేమంపై కీలక వ్యాఖ్యలు చేశారు. ఉగాది వేడుకల సందర్భంగా రాష్ట్ర అన్నదాతలకు శుభవార్త చెబుతూ, ఈ ఏడాదిని ‘రైతు నామ సంవత్సరం’గా అభివర్ణించారు.

వ్యవసాయాన్ని లాభసాటిగా మార్చి, రైతుల జీవితాల్లో వెలుగులు నింపడమే ప్రభుత్వ ధ్యేయమని ఆయన స్పష్టం చేశారు. ఇప్పటికే అన్నదాతలకు ₹2 లక్షల వరకు రుణమాఫీ చేశామని సీఎం గుర్తు చేశారు. రైతు భరోసా పథకం కోసం ప్రభుత్వం ఇప్పటివరకు ₹18 వేల కోట్లు ఖర్చు చేసిందని తెలిపారు. ఈ నెల 22వ తేదీన రైతులకు సంబంధించి మరో విడత నిధులను విడుదల చేయనున్నట్లు ముఖ్యమంత్రి ప్రకటించారు. ‘భూభారతి’ ద్వారా రాష్ట్రంలోని భూ సమస్యలన్నింటినీ త్వరలోనే పరిష్కరిస్తామని హామీ ఇచ్చారు.

రైతు సంక్షేమానికి మా ప్రభుత్వం కట్టుబడి ఉంది. రైతులను రాజులుగా చూడాలన్నదే మా అంతిమ లక్ష్యం అని అన్నారు.