ఈవీఎంల భద్రతపై కలెక్టర్ చాహత్ బాజ్‌పాయి సమీక్ష.. గోదాం తనిఖీ :
హనుమకొండ: ఎన్నికల నిర్వహణలో కీలకమైన ఎలక్ట్రానిక్ ఓటింగ్ మిషన్ల (ఈవీఎంలు) భద్రతపై జిల్లా యంత్రాంగం ప్రత్యేక దృష్టి సారిస్తుంది. ఇందులో భాగంగా హనుమకొండ జిల్లా కలెక్టర్ చాహత్ బాజ్ పాయి శనివారం సుబేదారిలోని రెడ్ క్రాస్ భవనం వెనుక ఉన్న ఈవీఎంలు, వివిప్యాట్‌లు భద్రపరిచిన గోదామును తనిఖీ చేశారు. ఈ కార్యక్రమంలో గుర్తింపు పొందిన వివిధ రాజకీయ పార్టీల ప్రతినిధులు కూడా పాల్గొన్నారు.
భారత ఎన్నికల సంఘం మార్గదర్శకాల ప్రకారం ప్రతి మూడు నెలలకు ఒకసారి నిర్వహించే సాధారణ తనిఖీలో భాగంగా ఈ పరిశీలన చేపట్టారు. గోదాములో భద్రపరిచిన ఈవీఎంలు ఈవీఎంలు, వివిప్యాట్‌లు, బ్యాలెట్ యూనిట్లు, కంట్రోల్ యూనిట్లు తదితర ఎన్నికల సామగ్రిని కలెక్టర్ క్షుణ్ణంగా పరిశీలించారు. నిల్వ గదుల పరిస్థితి, భద్రతా ఏర్పాట్లు, యంత్రాల సంరక్షణ విధానాలను సమీక్షించి అధికారులకు అవసరమైన సూచనలు చేశారు.
అదేవిధంగా గోదాం పరిసరాల్లో ఏర్పాటు చేసిన సీసీ కెమెరాల పనితీరును పరిశీలించి.. భద్రతా వ్యవస్థలు సమర్థవంతంగా పనిచేస్తున్నాయా అనే అంశాన్ని పరిశీలించారు. ఎన్నికల సామాగ్రి భద్రతా విషయంలో ఎలాంటి అలసత్వానికి తావు లేకుండా అప్రమత్తంగా వ్యవహరించాలని సంబంధిత అధికారులను ఆదేశించారు. నిర్వహణకు సంబంధించిన రికార్డులు, రిజిస్టర్లను పరిశీలించి సంతకాలు చేశారు.
ఈ తనిఖీల్లో జిల్లా అదనపు కలెక్టర్ ఎన్. రవి, ఆర్డీవో వెంకటేష్, ఎన్నికల విభాగం సూపరింటెండెంట్ జగత్ సింగ్, తహసీల్దార్ రవీందర్ రెడ్డి తదితర అధికారులు పాల్గొన్నారు. అలాగే వివిధ రాజకీయ పార్టీల ప్రతినిధులు కూడా హాజరై తనిఖీ ప్రక్రియను పరిశీలించారు. ఎన్నికల సామగ్రి భద్రతపై జిల్లా యంత్రాంగం తీసుకుంటున్న చర్యలను ఈ సందర్భంగా కలెక్టర్ వివరించారు.