కాజీపేట: ఆపదలో ఉన్నవారికి ‘డయల్-100’ నిజంగానే ప్రాణదాతగా మారుతోంది. కాజీపేటలో ఆత్మహత్యకు యత్నించిన ఒక మహిళను పోలీసులు అత్యంత చాకచక్యంగా వ్యవహరించి ప్రాణాపాయం నుంచి రక్షించారు.

కాజీపేట పరిధిలో ఒక మహిళ తీవ్ర మనస్తాపంతో ఆత్మహత్యకు యత్నిస్తున్నట్లు పోలీసులకు సమాచారం అందింది. వెంటనే స్పందించిన బ్లూకోల్ట్స్ పోలీసులు సంఘటనా స్థలానికి చేరుకున్నారు. నిమిషాల వ్యవధిలో అక్కడకు చేరుకోవడంతో పెను ప్రమాదం తప్పింది.

పోలీసులు బాధితురాలిని వెంటనే రక్షించి, ఆమెకు ప్రాథమిక చికిత్స అందించారు. అనంతరం ఆమెను సురక్షితంగా కాజీపేట పోలీస్ స్టేషన్‌కు తరలించారు. అక్కడ పోలీసులు ఆమెకు మరియు ఆమె కుటుంబ సభ్యులకు కౌన్సెలింగ్ ఇచ్చారు. చివరకు బాధితురాలిని ఆమె సోదరికి అప్పగించారు.

సమయస్ఫూర్తితో వ్యవహరించి ఒక నిండు ప్రాణాన్ని కాపాడిన బ్లూకోల్ట్స్ సిబ్బందిని కాజీపేట ఇన్‌స్పెక్టర్ ప్రత్యేకంగా అభినందించారు. క్లిష్ట సమయంలో డయల్-100 సేవలను వినియోగించుకోవడం వల్ల ప్రాణాలు కాపాడుకోవచ్చని ఈ ఘటన మరోసారి నిరూపించింది.