జల్సాలకు అలవాటు పడి నేరాల బాట పట్టిన ఇద్దరు యువకులను హనుమకొండ మరియు సిసిఎస్ పోలీసులు సంయుక్తంగా అరెస్ట్ చేశారు. వారి వద్ద నుండి సుమారు 2 లక్షల రూపాయల విలువైన రెండు తులాల బంగారు పుస్తేల తాడును స్వాధీనం చేసుకున్నారు.

​ నిందితులు ఇద్దరు హనుమకొండలోని ఒక ప్రైవేట్ హాస్టల్‌లో ఉంటూ, విలాసాల కోసం ఒంటరి మహిళలను లక్ష్యంగా చేసుకున్నారు. ఈ నెల 4వ తేదీన పెద్దమ్మ గడ్డ ఏరియాలో ప్రయత్నించి విఫలమవ్వగా, మే 5వ తేదీన బొక్కలగడ్డ ప్రాంతంలో ఓ మహిళ మెడలోని రెండు తులాల పుస్తెల తాడును తెంపుకుని బైక్‌పై పారిపోయారు.

దొంగిలించిన బంగారాన్ని అమ్మేందుకు వెళ్తుండగా పోలీసులకు చిక్కారు. నిందితులను చీకటి రాహుల్ (21, తొర్రూరు), ఉట్కూరి సాయి కిరణ్ (22, గోవిందరావుపేట)గా గుర్తించారు.

హన్మకొండ ఇన్ స్పెక్టర్ మచ్చ శివకుమార్ మాట్లాడుతూ.. యువత మత్తుకు, జల్సాలకు బానిసలై జీవితాలను నాశనం చేసుకోవద్దని హితవు పలికారు. నేరాలకు పాల్పడే వారిపై కఠిన చర్యలు తీసుకుంటామని, వ్యసనాల నుంచి బయటపడాలనుకునే వారికి డి-అడిక్షన్ సెంటర్ల ద్వారా సహకారం అందిస్తామని తెలిపారు.

​రికవరీ చేసిన వస్తువులు:

•​ రెండు తులాల బంగారు పుస్తెల తాడు

• ​ఒక మోటార్ సైకిల్

• ​ఒక సెల్ ఫోన్

నేరాన్ని తక్కువ సమయంలో ఛేదించిన ఇన్ స్పెక్టర్లు మచ్చ శివకుమార్, రాఘవేంద్ర, రామకృష్ణ మరియు సిబ్బందిని హన్మకొండ ఏసీపీ అభినందించారు.