ఐనవోలు (హనుమకొండ):

రైతుల చిరకాల భూ సమస్యలకు శాశ్వత పరిష్కారం చూపించడంతోపాటు, యాజమాన్య హక్కులు, భూ సరిహద్దులపై పూర్తి స్పష్టత కల్పించడమే తెలంగాణ ప్రభుత్వం ప్రతిష్టాత్మకంగా చేపడుతున్న ‘భూభారతి’ డిజిటల్ రీ-సర్వే ప్రధాన లక్ష్యమని రెవెన్యూ అధికారులు స్పష్టం చేశారు. రాష్ట్ర ప్రభుత్వ ఆదేశాల మేరకు హనుమకొండ జిల్లా కలెక్టర్ చాహత్ బాజ్‌‌పాయ్ సూచనలతో జిల్లావ్యాప్తంగా రెవెన్యూ యంత్రాంగం ముమ్మరంగా అవగాహన సదస్సులు నిర్వహిస్తోంది.

​ఇందులో భాగంగా ఐనవోలు మండల పరిధిలోని కనపర్తి గ్రామంలో తహశీల్దార్ విక్రమ్ వనమాల ఆధ్వర్యంలో రైతులకు భూ సర్వేపై ప్రత్యేక అవగాహన సదస్సు నిర్వహించారు. ఈ కార్యక్రమానికి అడిషనల్ కలెక్టర్, ఆర్డీవో, తహశీల్దార్ హాజరై రీ-సర్వే విధానం, ప్రయోజనాలపై రైతులకు క్షేత్రస్థాయిలో అవగాహన కల్పించారు.

​ఈ సందర్భంగా అధికారులు మాట్లాడుతూ.. దశాబ్దాలుగా ఉన్న భూ వివాదాలకు ముగింపు పలికేందుకు అత్యాధునిక సాంకేతిక పరిజ్ఞానంతో రీ-సర్వే పనులు చేపడుతున్నట్లు తెలిపారు. రైతులు తమ భూముల సరిహద్దుల వద్ద సంబంధిత ధ్రువీకరణ పత్రాలతో క్షేత్రస్థాయిలో అందుబాటులో ఉంటూ సర్వే బృందాలకు పూర్తిస్థాయిలో సహకరించాలని పిలుపునిచ్చారు. రీ-సర్వే పూర్తయితే ప్రతి గుంట భూమికి పక్కా కొలతలు, సరిహద్దులతో కూడిన డిజిటల్ రికార్డులు అందుబాటులోకి వస్తాయని, దీంతో భవిష్యత్తులో భూ వివాదాలకు తావుండదని పేర్కొన్నారు. ఈ కార్యక్రమంలో స్థానిక ప్రజాప్రతినిధులు, రెవెన్యూ సిబ్బంది, గ్రామ రైతులు పెద్ద సంఖ్యలో పాల్గొన్నారు.