హనుమకొండ: ఫీల్డ్ లో పనిచేసే విద్యుత్ సిబ్బంది ప్రాణాల రక్షణే పరమావధిగా సరికొత్త నిబంధనను తెరపైకి తెచ్చింది విద్యుత్ శాఖ. ప్రమాదాల నివారణకు గానూ ప్రత్యేకంగా “వన్ మినిట్ రూల్” (ఒక్క నిమిషం నియమం) అనే సరికొత్త విధానాన్ని అమలు చేస్తున్నట్లు హనుమకొండ సూపరింటెండింగ్ ఇంజనీర్ (SE) సామ్యా నాయక్ స్పష్టం చేశారు.
అసలు ఏంటి ఈ వన్ మినిట్ రూల్?
సాధారణంగా క్షేత్రస్థాయిలో పనులు ప్రారంభించే కంగారులో కొన్ని చిన్నచిన్న భద్రతా లోపాలు జరుగుతుంటాయి. అవే పెద్ద ప్రమాదాలకు దారితీస్తుంటాయి. ఈ సమస్యకు చెక్ పెట్టడమే ఈ నయా రూల్ ఉద్దేశం.
విద్యుత్ లైన్లు లేదా స్తంభాలపై పనులు ప్రారంభించే ముందు ప్రతి ఉద్యోగి/కార్మికుడు కేవలం ఒక నిమిషం పాటు ఆగి ఆలోచించాలి.
తాము తీసుకోబోయే భద్రతా ప్రమాణాలు సరిగ్గా ఉన్నాయా? గ్లౌజ్స్, హెల్మెట్, బెల్ట్ వంటి రక్షణ పరికరాలను సమగ్రంగా ధరించామా లేదా అనేది ఆ నిమిషంలో క్షుణ్ణంగా చెక్ చేసుకోవాల్సి ఉంటుంది.
“ఫీల్డ్‌లో పనిచేసే సిబ్బంది తొందరపాటు పడకుండా, పని మొదలుపెట్టే ముందు ఒక్క నిమిషం తమ భద్రతను సమీక్షించుకోవడం ద్వారా విద్యుత్ ప్రమాదాలను గణనీయంగా తగ్గించవచ్చు. ప్రతి ఒక్కరి ప్రాణం మాకు అమూల్యమైనది.”— సామ్యా నాయక్, హనుమకొండ ఎస్‌ఈ
ఈ ప్రత్యేక రక్షణ విధానం ద్వారా ప్రమాదాల రేటును పూర్తిగా సున్నాకు తీసుకురావడమే ప్రధాన లక్ష్యంగా విద్యుత్ శాఖ అడుగులు వేస్తోంది.