కరీంనగర్ నగరంలో దొంగలు బీభత్సం సృష్టించారు. స్థానిక PMJ జువెలరీ షాపులో ఐదుగురు దుండగులు తుపాకులతో చొరబడి భారీ దోపిడీకి పాల్పడ్డారు. అడ్డుకోబోయిన షాపు సిబ్బందిపై దుండగులు కాల్పులు జరిపి, పెద్ద ఎత్తున బంగారు ఆభరణాలను దోచుకెళ్లారు. నలుగురు సిబ్బందికి తీవ్ర గాయాలయ్యాయి. షాపు రక్తసిక్తమైంది. దుండగులు భారీగా బంగారాన్ని ఎత్తుకెళ్లారు.

ఘటనాస్థలానికి చేరుకున్న పోలీసులు గన్ మ్యాగజైన్, బుల్లెట్లను స్వాధీనం చేసుకున్నారు. నిందితుల కోసం గాలింపు చర్యలు చేపట్టారు.

​వరంగల్‌లో ముమ్మర తనిఖీలు

​కరీంనగర్ ఘటన నేపథ్యంలో పొరుగు జిల్లా అయిన వరంగల్ పోలీసులు అప్రమత్తమయ్యారు. పైఅధికారుల ఆదేశాల మేరకు వరంగల్ కమిషనరేట్ పరిధిలో పోలీసులు హై అలర్ట్ ప్రకటించారు.

నగర శివార్లలో మరియు ప్రధాన రహదారుల వద్ద పోలీసులు ముమ్మరంగా వాహనాలను తనిఖీ చేస్తున్నారు.

నిందితులు తప్పించుకోకుండా సరిహద్దుల వద్ద కట్టుదిట్టమైన భద్రతను ఏర్పాటు చేశారు. ఎవరైనా అనుమానాస్పద వ్యక్తులు లేదా వాహనాలు కనిపిస్తే వెంటనే సమాచారం అందించాలని ప్రజలకు పోలీసులు సూచించారు.