రైతులకు ఆధునిక సాంకేతికతను చేరువ చేసే లక్ష్యంతో హనుమకొండలోని ఆర్ట్స్ అండ్ సైన్స్ కళాశాల మైదానంలో ఏర్పాటు చేసిన రాష్ట్ర స్థాయి మెగా రైతు మేళా మంగళవారం వైభవంగా ప్రారంభమైంది. రాష్ట్ర మంత్రులు పొంగులేటి శ్రీనివాస రెడ్డి, కొండా సురేఖ, మరియు సీతక్క ఈ కార్యక్రమానికి ముఖ్య అతిథులుగా విచ్చేసి జ్యోతి ప్రజ్వలన చేశారు.
మంత్రులు ముగ్గురు మేళాలోని వ్యవసాయ, ఉద్యాన, పశుసంవర్ధక శాఖల స్టాళ్లను స్వయంగా సందర్శించారు. నూతన వ్యవసాయ పనిముట్లు, డ్రోన్ టెక్నాలజీ, సూక్ష్మ సేద్యంపై అధికారులు అందించిన వివరాలను అడిగి తెలుసుకున్నారు.
ప్రభుత్వ పథకాలు నేరుగా రైతులకు ఎలా చేరుతున్నాయో అధికారులతో చర్చించారు. స్టాళ్ల వద్ద ఉన్న రైతులతో మంత్రులు మాట్లాడి, వారి సాగు అనుభవాలను పంచుకున్నారు.
”రైతులు కేవలం పాత పద్ధతులకే పరిమితం కాకుండా, ఆధునిక పరిజ్ఞానాన్ని అందిపుచ్చుకుని అధిక దిగుబడులు సాధించాలి. ఈ మేళా వారికి ఒక వేదికగా నిలుస్తుంది.”— రాష్ట్ర మంత్రుల బృందం
ఈ కార్యక్రమంలో జిల్లాకు చెందిన ఎంపీ డాక్టర్ కడియం కావ్య, మేయర్ గుండు సుధారాణి,ఎమ్మెల్సీ బస్వరాజు సారయ్య, ఎమ్మెల్యేలు కడియం శ్రీహరి, కేఆర్ నాగరాజు, నాయిని రాజేందర్ రెడ్డి, రేవూరి ప్రకాశ్ రెడ్డి, రాష్ట్ర స్థాయి అధికారులు సురేంద్ర మోహన్, యస్మిన్ బాషా, కలెక్టర్లు చాహాత్ బాజ్‌పాయి, డాక్టర్ సత్య శారద, కుడా చైర్మన్ ఇనగాల వెంకట్రామ రెడ్డి మరియు తదితరులు పెద్ద సంఖ్యలో పాల్గొన్నారు.