ములుగు: సమాజంలో పెచ్చురిల్లిపోతున్న గంజాయి, ఇతర మత్తు పదార్థాల రవాణా, విక్రయాలకు అడ్డుకట్ట వేసేందుకు ములుగు జిల్లా పోలీస్ శాఖ సరికొత్త అడుగు వేసింది. గంజాయి విక్రయదారులకు సంబంధించిన ఖచ్చితమైన సమాచారం అందించిన వారికి రూ. 5,116 నగదు బహుమతి అందజేస్తామని ములుగు జిల్లా ఎస్పీ సుధీర్ కేకన్ ప్రకటించారు. సమాచారం ఇచ్చిన వారి వివరాలను పూర్తిగా గోప్యంగా ఉంచుతామని ఆయన స్పష్టం చేశారు.

నేరస్థుల్లో మార్పు కోసం మొక్కలు నాటే కార్యక్రమం

​బుధవారం ములుగు పోలీస్ ప్రధాన కార్యాలయంలో ఒక వినూత్న కార్యక్రమానికి శ్రీకారం చుట్టారు. మత్తు పదార్థాల కేసుల్లో కోర్టు ద్వారా శిక్ష పడిన నలుగురు వ్యక్తులతో పోలీస్ అధికారులు ప్రధాన కార్యాలయ ఆవరణలో మొక్కలు నాటించారు.

​ఈ సందర్భంగా ఎస్పీ మాట్లాడుతూ… శిక్ష పడిన నేరస్థుల్లో సానుకూల మార్పు తీసుకురావాలనే ఉద్దేశంతోనే ఈ వినూత్న కార్యక్రమాన్ని చేపట్టినట్లు తెలిపారు. కేవలం శిక్షించడమే కాకుండా, వారిలో పర్యావరణ స్పృహను, బాధ్యతను పెంచడం ద్వారా సమాజంలో మంచి వ్యక్తులుగా మారేందుకు ఇదొక అవకాశమని పేర్కొన్నారు.

యువత మత్తుకు బానిస కావద్దు

యువత దేశానికి భవిష్యత్తని, ఎవరూ కూడా క్షణికానందం కోసం మత్తు పదార్థాల బారిన పడి తమ జీవితాలను, కుటుంబాలను నాశనం చేసుకోవద్దని ఎస్పీ సుధీర్ కేకన్ కోరారు. జిల్లాను డ్రగ్స్ రహితంగా మార్చేందుకు ప్రజలందరూ పోలీసులకు సహకరించాలని పిలుపునిచ్చారు.

​ఈ యాంటీ డ్రగ్ అవేర్‌నెస్ కార్యక్రమంలో అదనపు ఎస్పీ సదానందం, డీఎస్పీ రవీందర్ తదితర పోలీస్ సిబ్బంది పాల్గొన్నారు.

Read Warangal News and Latest Politics News and Real Estate