ఒక్క కాల్‌తో రెండు ప్రాణాలు కాపాడిన 108.. వరంగల్‌లో అరుదైన ఘటన:
వరంగల్ రైల్వే స్టేషన్‌లో ఓ గర్భిణీకి రైలులోనే సురక్షితంగా ప్రసవం జరగడంతో ప్రయాణికులు ఊపిరిపీల్చుకున్నారు. 108 అత్యవసర సేవల సిబ్బంది వేగంగా స్పందించి తల్లీబిడ్డల ప్రాణాలను కాపాడారు.
బీహార్ రాష్ట్రానికి చెందిన ఆర అంజుం (27) అనే మహిళ.. తన కుటుంబ కార్యక్రమంలో పాల్గొని బెంగళూరు నుంచి స్వగ్రామానికి రైలులో ప్రయాణం చేస్తున్న సమయంలోనే పురిటి నొప్పులు వచ్చాయి. ఆమెకు ఇది నాలుగో కాన్పు. ప్రయాణం మధ్యలోనే పురిటి నొప్పులు ఒక్కసారిగా తీవ్రంగా రావడంతో కుటుంబ సభ్యులు, సహ ప్రయాణికులు ఆందోళనకు గురయ్యారు. పరిస్థితిని గమనించిన రైల్వే అధికారులు వెంటనే స్పందించి వరంగల్ రైల్వే స్టేషన్ వద్ద రైలును నిలిపివేశారు.
అనంతరం 108 అత్యవసర సేవలకు సమాచారం అందించగా, ఈఎంటి కె. నాగరాజు, పైలట్ పి. అమర్ అత్యంత వేగంగా సంఘటన స్థలానికి చేరుకున్నారు. గర్భిణీ పరిస్థితిని పరిశీలించిన వారు తక్షణ వైద్య సహాయం అందిస్తూ రైలులోనే ప్రసవం నిర్వహించారు. వారి పర్యవేక్షణలో ఆర అంజుం పండంటి ఆడబిడ్డకు జన్మనిచ్చింది.
అత్యవసర పరిస్థితిలో 108 సిబ్బంది చూపిన చాకచక్యం, సమయస్ఫూర్తి వల్ల ప్రసవం ఎలాంటి ఇబ్బందులు లేకుండా పూర్తికావడంతో ప్రయాణికులు హర్షం వ్యక్తం చేశారు. తల్లీబిడ్డలు ఇద్దరూ ఆరోగ్యంగా ఉండటంతో అందరూ ఊరట చెందారు.
Read Warangal News and Latest Politics News and Real Estate