పరకాల: కాంగ్రెస్ పార్టీపై నమ్మకం ఉంచి 13 మంది కౌన్సిలర్లను గెలిపించిన పరకాల పట్టణ ప్రజలకు హృదయపూర్వక కృతజ్ఞతలు తెలుపుతున్నట్లు పరకాల శాసనసభ్యులు రేవూరి ప్రకాశ్ రెడ్డి తెలిపారు.

సోమవారం పరకాల పట్టణ కేంద్రంలోని ఎమ్మెల్యే క్యాంపు కార్యాలయంలో నిర్వహించిన మీడియా సమావేశంలో ఆయన మాట్లాడారు. పట్టణ ప్రజలు అభివృద్ధికి పట్టం కట్టారని, తనపై బాధ్యత మరింత పెరిగిందన్నారు.

నూతన మున్సిపల్ పాలకవర్గం

పరకాల మున్సిపల్ చైర్మన్‌గా పావుశెట్టి సునీల్, వైస్ చైర్మన్‌గా ఏకు దివ్యవిద్యాసాగర్ ఎన్నికైనట్లు వెల్లడించారు. నూతన పాలకవర్గం ప్రజలు మెచ్చేలా పారదర్శక పాలన అందిస్తుందని విశ్వాసం వ్యక్తం చేశారు.

అభివృద్ధికి రూ. 73 కోట్ల ప్రణాళిక

గత రెండు సంవత్సరాల్లో దాదాపు రూ. 38 కోట్లతో పట్టణాభివృద్ధి పనులు చేపట్టామని, మరో రూ. 35 కోట్లతో డ్రైనేజీ వ్యవస్థ, సీసీ రోడ్ల నిర్మాణం చేపట్టి పరకాలను మోడల్ మున్సిపాలిటీగా తీర్చిదిద్దుతామని తెలిపారు.

ఎన్నికల్లో ఇచ్చిన హామీ ప్రకారం మంచినీరు, డ్రైనేజీ, రోడ్ల పనులను వచ్చే రెండేళ్లలో పూర్తి చేస్తామని స్పష్టం చేశారు. జిల్లా స్థాయికి ఎదగాల్సిన పరకాల పట్టణం గత పాలకుల నిర్లక్ష్యంతో వెనుకబడిందని విమర్శించారు.

విద్య, ఉపాధి రంగాల్లో ప్రగతి

యంగ్ ఇండియా ఇంటిగ్రేటెడ్ స్కూల్ ఏర్పాటు చేసి విద్యారంగాన్ని బలోపేతం చేస్తామని, ఐటీఐ, టాస్క్, స్కిల్ డెవలప్‌మెంట్ సెంటర్‌లు ఏర్పాటు చేయనున్నట్లు వెల్లడించారు.

ఇంటిగ్రేటెడ్ మార్కెట్ భవనాన్ని ఇండోర్ స్టేడియంగా మార్చే ప్రతిపాదనపై పనిచేస్తున్నట్లు తెలిపారు. మార్కెటింగ్ వ్యవస్థను బలోపేతం చేసి పట్టణ రూపురేఖలు మార్చేలా కృషి చేస్తామని చెప్పారు.

రాజకీయ విమర్శలు

కాంగ్రెస్‌కు 13 సీట్లు, బీఆర్ఎస్‌కు 6 సీట్లు మాత్రమే వచ్చాయని పేర్కొంటూ, గెలిచిన తమ వారిని ప్రలోభాలకు గురి చేసే ప్రయత్నాలు జరిగాయని ఆరోపించారు. బీఆర్ఎస్, బీజేపీ నాయకుల కుట్రపూరిత రాజకీయాలు ఫలించలేదన్నారు.