వరంగల్: విద్యార్థి దశ నుంచే క్రమశిక్షణ, సేవాభావం, నాయకత్వ లక్షణాలు, సానుకూల ఆలోచనా విధానాన్ని అలవర్చుకోవడం ద్వారా మంచి వ్యక్తిత్వాన్ని పెంపొందించుకోవచ్చని వరంగల్ పోలీస్ కమిషనర్ ఎన్. శ్వేత, IPS అన్నారు. వ్యక్తిత్వ వికాసమే విద్య, ఉద్యోగం, సామాజిక సేవతో పాటు అన్ని రంగాల్లో అభివృద్ధికి పునాది అని పేర్కొన్నారు.
గురువారం పింగిలి ప్రభుత్వ మహిళా కళాశాలలో నిర్వహించిన నేషనల్ సర్వీస్ స్కీమ్ (NSS) దిశానిర్దేశక కార్యక్రమానికి సీపీ ఎన్. శ్వేత ముఖ్య అతిథిగా హాజరయ్యారు.
ఈ సందర్భంగా ఆమె మాట్లాడుతూ, NSS కార్యక్రమాల ద్వారా విద్యార్థుల్లో సామాజిక బాధ్యత, సేవాభావం, నాయకత్వ లక్షణాలు, సమాజం పట్ల బాధ్యతాయుతమైన దృక్పథం పెంపొందుతాయని తెలిపారు. విద్యార్థులు తమలోని ప్రతిభను గుర్తించి, దానిని సద్వినియోగం చేసుకోవాలని సూచించారు.
సమాజానికి ఉపయోగపడే NSS వంటి కార్యక్రమాల్లో విద్యార్థులు చురుకుగా పాల్గొనడం ద్వారా సేవాభావంతో పాటు నాయకత్వ లక్షణాలను కూడా అభివృద్ధి చేసుకోవచ్చని సీపీ పేర్కొన్నారు.
కార్యక్రమంలో కళాశాల ప్రిన్సిపాల్ ప్రొఫెసర్ బి. చంద్రమౌళి, NSS ప్రోగ్రామ్ అధికారులు, కాకతీయ యూనివర్సిటీ ప్రొఫెసర్ ఈసం నారాయణ, కళాశాల అధ్యాపకులు, విద్యార్థినులు, ఇతర సిబ్బంది పాల్గొన్నారు.