వరంగల్:
వరంగల్ పోలీస్ కమిషనర్ Sun Preet Singh గురువారం సంగెం పోలీస్ స్టేషన్‌ను సందర్శించి అక్కడి పనితీరును సమీక్షించారు. పోలీస్ స్టేషన్‌కు చేరుకున్న కమిషనర్‌కు అధికారులు పుష్పగుచ్ఛంతో స్వాగతం పలికారు.
ఈ సందర్భంగా ముందుగా పోలీస్ స్టేషన్ పరిసరాలను పరిశీలించిన సీపీ, స్టేషన్ ఆవరణలో మామిడి మొక్కను నాటారు. అనంతరం స్టేషన్ పరిధిలోని గ్రామాలు, ప్రజల జీవన విధానం, స్థానిక నేరాలు, రౌడీ షీటర్లు మరియు అనుమానితులపై ఇన్స్‌పెక్టర్‌ను అడిగి వివరాలు తెలుసుకున్నారు.
పోలీస్ సిబ్బంది పనితీరు, బీట్ వ్యవస్థ, పెట్రోలింగ్, రికార్డుల నిర్వహణపై సమగ్ర సమీక్ష నిర్వహించారు. స్టేషన్‌లో నమోదైన కేసులు, పెండింగ్ కేసులు, నిందితుల అరెస్టు ప్రక్రియపై రికార్డులను పరిశీలించారు.
ఈ సందర్భంగా కమిషనర్ మాట్లాడుతూ, పోలీస్ స్టేషన్‌కు వచ్చే ప్రతి బాధితుడికి న్యాయం జరుగుతుందనే నమ్మకం కలిగేలా పోలీసులు పనిచేయాలని సూచించారు. ఫిర్యాదులపై వెంటనే స్పందించాలని, విధి నిర్వహణలో పారదర్శకత పాటించాలని తెలిపారు. ప్రజల విశ్వాసం పొందేలా పోలీస్ వ్యవస్థ పనిచేయాలని ఆదేశించారు.
ఈ కార్యక్రమంలో ఈస్ట్ జోన్ డీసీపీ అంకిత్ కుమార్, మామూనూర్ ఏసీపీ వెంకటేష్, పర్వతగిరి సిఐ రాజగోపాల్, సంగెం ఎస్‌ఎస్‌ఐ వంశీకృష్ణతో పాటు ఇతర సిబ్బంది పాల్గొన్నారు.