హైదరాబాద్: అంగన్‌వాడీ మొబైల్ ఫోన్ల కొనుగోలు వ్యవహారంలో రాష్ట్ర మంత్రి సీతక్కపై బీఆర్ఎస్ చేసిన అవినీతి ఆరోపణలకు సంబంధించి హైదరాబాద్ సిటీ సివిల్ కోర్టు సంచలన తీర్పునిచ్చింది. బీఆర్ఎస్ చేసినవి తప్పుడు ప్రచారాలని ప్రాథమికంగా నిర్ధారిస్తూ, మంత్రి ప్రతిష్ఠకు భంగం కలిగించేలా ఉన్న సోషల్ మీడియా పోస్టులను వెంటనే తొలగించాలని న్యాయస్థానం మధ్యంతర ఉత్తర్వులు జారీ చేసింది.
ఆరోపణల్లో వాస్తవం లేదు: కోర్టు
అంగన్‌వాడీ ఫోన్ల కొనుగోలులో సుమారు రూ.30 కోట్ల మేర అవినీతి జరిగిందని బీఆర్ఎస్ ఆరోపించిన సంగతి తెలిసిందే. అయితే, టెండర్ నోటిఫికేషన్ల నుండి చెల్లింపుల వివరాల వరకు అన్ని ప్రభుత్వ రికార్డులను క్షుణ్ణంగా పరిశీలించిన న్యాయస్థానం.. ఈ ఆరోపణల్లో ఎలాంటి ఆధారాలు లేవని స్పష్టం చేసింది.
ప్రభుత్వం ఒక్కో మొబైల్ ఫోన్‌ను రూ.11,650 చొప్పున మొత్తం రూ.44.42 కోట్లతో పారదర్శకంగా కొనుగోలు చేసిందని పత్రాలు చెబుతుండగా.. బీఆర్ఎస్ మాత్రం రూ.8,499 విలువైన ఫోన్‌ను రూ.14,499కి కొనుగోలు చేశారంటూ తప్పుడు ప్రచారం చేసిందని కోర్టు అభిప్రాయపడింది. ఏప్రిల్ 10న బీఆర్ఎస్ అధికారిక సోషల్ మీడియా ఖాతాల్లో పోస్ట్ చేసిన వివాదాస్పద కంటెంట్‌ను తక్షణమే డిలీట్ చేయాలని ఆదేశించింది.
రాజకీయ ప్రయోజనాల కోసమే దుష్ప్రచారం
మంత్రి సీతక్క ప్రతిష్ఠను రాజకీయంగా దెబ్బతీసేందుకే బీఆర్ఎస్ పార్టీ ఈ రకమైన అసత్య ఆరోపణలు చేసిందన్న వాదనతో కోర్టు ఏకీభవించింది. ఈ మేరకు బీఆర్ఎస్ అధినేత కేసీఆర్‌తో పాటు పార్టీ సోషల్ మీడియా విభాగంపై మంత్రి సీతక్క దాఖలు చేసిన పరువు నష్టం దావాను కోర్టు విచారణకు స్వీకరించింది.
ఈ కేసులో మంత్రి తరఫున సీనియర్ అడ్వకేట్ నాగులూరి కృష్ణ కుమార్ వాదనలు వినిపించారు. ప్రభుత్వం దగ్గర ఉన్న ఆధారాలను కోర్టుకు సమర్పించి, బీఆర్ఎస్ ఆరోపణలను తిప్పికొట్టారు. వాదనల అనంతరం, బీఆర్ఎస్ పార్టీకి మరియు కేసీఆర్‌కు కోర్టు గట్టి హెచ్చరికలతో కూడిన ఆదేశాలను జారీ చేసింది. రాజకీయ విమర్శలు చేసేటప్పుడు వాస్తవాలను సరిచూసుకోవాలని ఈ తీర్పు ద్వారా కోర్టు పరోక్షంగా సూచించింది.