చెన్నై: తమిళనాడు రాజకీయ చరిత్రలో ఒక సరికొత్త అధ్యాయం మొదలైంది. దశాబ్దాల కాలంగా రాష్ట్ర రాజకీయాలను శాసించిన ప్రధాన ద్రవిడ పార్టీల ఆధిపత్యానికి చెక్ పెడుతూ, తమిళగ వెట్రి కళగం (TVK) అధినేత విజయ్ ముఖ్యమంత్రి పీఠాన్ని అధిష్టించబోతున్నారు. ఈ క్రమంలో రాష్ట్రంలో రాజకీయ సమీకరణాలు అనూహ్య మలుపులు తిరుగుతున్నాయి.
టీవీకేకు కాంగ్రెస్ జై కొట్టింది..!
ప్రభుత్వ ఏర్పాటుకు అవసరమైన మద్దతు విషయంలో సందిగ్ధత నెలకొన్న వేళ, జాతీయ కాంగ్రెస్ పార్టీ సంచలన నిర్ణయం తీసుకుంది. తమిళనాడులోని కాంగ్రెస్ ఎమ్మెల్యేలు అందరూ నేడు విజయ్‌ను కలిసి తమ మద్దతును అధికారికంగా ప్రకటించారు. లౌకిక విలువలను కాపాడటమే లక్ష్యంగా టీవీకే ప్రభుత్వానికి మద్దతు ఇస్తున్నట్లు కాంగ్రెస్ అధిష్ఠానం స్పష్టం చేసింది. ఈ పరిణామంతో విజయ్ నేతృత్వంలోని కూటమి బలం మెజారిటీ మార్కును దాటింది.
తరలిరానున్న రాహుల్ గాంధీ..?
ఈ అపూర్వ ఘట్టాన్ని జాతీయ స్థాయిలో ప్రాధాన్యత కలిగిన అంశంగా మార్చేందుకు కాంగ్రెస్ సిద్ధమైంది. రేపు జరగనున్న విజయ్ ప్రమాణ స్వీకార కార్యక్రమానికి ఏఐసీసీ ఉపాధ్యక్షులు, లోక్‌సభ ప్రతిపక్ష నేత రాహుల్ గాంధీ హాజరుకాబోతున్నారు. ఒక కొత్త ప్రాంతీయ పార్టీ అధికారంలోకి వస్తున్న సమయంలో రాహుల్ గాంధీ స్వయంగా రావడం రాజకీయ వర్గాల్లో హాట్ టాపిక్ అయింది. ఇది భవిష్యత్తులో జాతీయ స్థాయిలో ఏర్పడబోయే సరికొత్త రాజకీయ పొత్తులకు సంకేతమని విశ్లేషకులు భావిస్తున్నారు.
రేపే ముహూర్తం
చెన్నైలో అత్యంత వైభవంగా జరగనున్న ఈ కార్యక్రమంలో విజయ్ ముఖ్యమంత్రిగా ప్రమాణ స్వీకారం చేయనున్నారు. సినీ గ్లామర్‌తో పాటు బలమైన ప్రజా మద్దతు కలిగిన విజయ్, ముఖ్యమంత్రిగా ఎలాంటి పాలన అందిస్తారనే దానిపై ఇప్పుడు సర్వత్రా ఆసక్తి నెలకొంది. ఈ మార్పుతో తమిళనాడులో డీఎంకే, ఏఐఏడీఎంకేలకు గట్టి పోటీ ఎదురైనట్లయింది.