వర్ధన్నపేట, మే 09: వర్ధన్నపేటలో ఆకేరు వాగుపై చెక్ డ్యాం శాశ్వత మరమ్మత్తు పనులకు వరంగల్ పార్లమెంట్ సభ్యురాలు డాక్టర్ కడియం కావ్య శంకుస్థాపన చేశారు. స్థానిక ఎమ్మెల్యే కే.ఆర్ నాగరాజు తో కలిసి రూ.46.90 లక్షల వ్యయంతో చేపడుతున్న పనులను ప్రారంభించారు.
అనంతరం ‘ప్రజా పాలన – ప్రగతి ప్రణాళిక’లో భాగంగా నిర్వహించిన రైతు వారము కార్యక్రమంలో పాల్గొన్న ఎంపీ కడియం కావ్య మాట్లాడుతూ, గత పాలకులు ప్రజల సమస్యలను పట్టించుకోలేదని విమర్శించారు. కాంగ్రెస్ ప్రభుత్వం అధికారంలోకి వచ్చిన తర్వాతే అభివృద్ధి పనులు వేగంగా జరుగుతున్నాయని పేర్కొన్నారు.
తాను ఏరియా ఆసుపత్రిలో వైద్యురాలిగా పనిచేసిన సమయంలో వర్షాలు పడితే రోడ్లపై భారీగా నీరు నిలిచి ప్రజలు తీవ్ర ఇబ్బందులు పడేవారని గుర్తు చేసుకున్నారు. ఆ సమస్యను ఎన్నిసార్లు చూసినా గత పాలకులు శాశ్వత పరిష్కారంపై దృష్టి పెట్టలేదన్నారు. కాంగ్రెస్ ప్రభుత్వం ఏర్పడిన తర్వాత ఎమ్మెల్యే కే.ఆర్ నాగరాజు చొరవతో శాశ్వత మరమ్మత్తు పనులు ప్రారంభమయ్యాయని తెలిపారు.
“కాంగ్రెస్ మాటల ప్రభుత్వం కాదు.. చేతల ప్రభుత్వం” అని స్పష్టం చేసిన ఎంపీ, ప్రజలకు ఉపయోగపడే పనులకే ప్రాధాన్యత ఇస్తున్నామని చెప్పారు. ఇప్పటికే తన ఎంపీ నిధుల నుంచి వర్ధన్నపేట నియోజకవర్గ అభివృద్ధికి రూ.1.25 కోట్లు మంజూరు చేశానని, ప్రతి ఏడాది రూ.50 నుంచి రూ.60 లక్షల వరకు అభివృద్ధి పనులకు కేటాయిస్తున్నామని వెల్లడించారు.
స్థానిక ఎమ్మెల్యే కే.ఆర్ నాగరాజు నియోజకవర్గ సమస్యల పరిష్కారానికి నిరంతరం కృషి చేస్తున్నారని ప్రశంసించిన ఎంపీ, “ఈ నియోజకవర్గానికి ఆడబిడ్డగా నా వంతు సహకారం ఎప్పటికీ అందిస్తూనే ఉంటాను” అని తెలిపారు.
రాష్ట్ర ప్రభుత్వం ప్రతిష్టాత్మకంగా నిర్వహిస్తున్న ‘ప్రజా పాలన – ప్రగతి ప్రణాళిక’ ద్వారా 90 రోజుల వ్యవధిలో ప్రభుత్వ సేవలను ప్రజలకు చేరవేస్తూ, పెండింగ్ సమస్యలకు వేగంగా పరిష్కారం చూపుతున్నట్లు పేర్కొన్నారు.
ఈ కార్యక్రమంలో మున్సిపల్ చైర్మన్ సారంగపాణి, వైస్ చైర్మన్ శోభారాణి, ఇరిగేషన్ అధికారులు, ప్రజాప్రతినిధులు, నాయకులు తదితరులు పాల్గొన్నారు.