నెంబర్ ప్లేట్ లేని వాహనాలపై ప్రత్యేక డ్రైవ్.. 28 వాహనాలకు చలాన్లు:
వరంగల్–కాజీపేట నగర పరిధిలో నెంబర్ ప్లేట్లు లేకుండా లేదా నిబంధనలకు విరుద్ధంగా వాహనాలు నడిపిస్తున్న వారిపై ట్రాఫిక్ పోలీసులు ప్రత్యేక నిఘా కొనసాగిస్తున్నారు. ట్రాఫిక్ డీసీపీ రాయల ప్రభాకర్ రావు, ట్రాఫిక్ ఏసీపీ సత్యనారాయణ ఆదేశాల మేరకు కాజీపేట ట్రాఫిక్ సీఐ వెంకన్న ఆధ్వర్యంలో ప్రత్యేక తనిఖీలు నిర్వహించారు.
జూన్ 12, 13 తేదీలలో నిర్వహించిన ఈ ప్రత్యేక డ్రైవ్లో ట్రాఫిక్ ఎస్ఐలు సంపత్, మంగతో పాటు సిబ్బంది పాల్గొన్నారు. తనిఖీల సందర్భంగా నెంబర్ ప్లేట్లు లేకుండా లేదా సరిగా ప్రదర్శించకుండా నడుపుతున్న సుమారు 28 వాహనాలను గుర్తించారు. ఆయా వాహనదారులకు చలాన్లు విధించడంతో పాటు వెంటనే నెంబర్ ప్లేట్లు ఏర్పాటు చేయించి వాహనాలను విడుదల చేశారు.
అదేవిధంగా రిజిస్ట్రేషన్ లేకుండా నడుపుతున్న 10 ద్విచక్ర వాహనాలను పోలీసులు స్వాధీనం చేసుకుని డిటైన్ చేశారు. సంబంధిత పత్రాలు సమర్పించిన తర్వాత మాత్రమే తదుపరి చర్యలు తీసుకోనున్నట్లు అధికారులు తెలిపారు.
ఈ సందర్భంగా ట్రాఫిక్ పోలీసులు వాహనదారులకు కీలక సూచనలు చేశారు. ప్రతి వాహనానికి చట్టబద్ధమైన నెంబర్ ప్లేట్ తప్పనిసరిగా ఉండాలని, రిజిస్ట్రేషన్ వివరాలు స్పష్టంగా కనిపించేలా ఏర్పాటు చేయాలని సూచించారు. నెంబర్ ప్లేట్ లేకుండా లేదా నిబంధనలకు విరుద్ధంగా వాహనాలు నడిపితే మోటారు వాహనాల చట్టం ప్రకారం కఠిన చర్యలు తీసుకుంటామని హెచ్చరించారు.
వరంగల్, కాజీపేట ప్రాంతాల్లో ఇకపై ఇలాంటి ఉల్లంఘనలపై మరింత కఠినంగా వ్యవహరించనున్నట్లు అధికారులు స్పష్టం చేశారు. వాహనదారులు ట్రాఫిక్ నిబంధనలు పాటిస్తూ అవసరమైన అన్ని పత్రాలతోనే వాహనాలను నడపాలని విజ్ఞప్తి చేశారు.