హన్మకొండ/వరంగల్: వచ్చే విద్యా సంవత్సరం (2026-2027) నుండి ఉమ్మడి వరంగల్ జిల్లా వ్యాప్తంగా సరికొత్త విద్యా విప్లవానికి ప్రభుత్వం శ్రీకారం చుట్టబోతోంది. హనుమకొండ జిల్లాలో నాలుగు, వరంగల్ జిల్లాలో రెండు చొప్పున మొత్తం ఆరు ‘తెలంగాణ పబ్లిక్ స్కూళ్లను’ ఏర్పాటు చేసేందుకు ప్రభుత్వం అనుమతినిచ్చింది.
ప్రీ-ప్రైమరీ నుండి ఇంటర్మీడియట్ వరకు ఒకే చోట బోధన అందుతుంది. ఒక్కో స్కూల్ అభివృద్ధి కోసం దాదాపు రూ. 15 కోట్ల వరకు నిధులను ప్రభుత్వం కేటాయించనుంది.
ఇవి సెమీ రెసిడెన్షియల్ పద్ధతిలో నడుస్తాయి. విద్యతో పాటు క్రీడలు, కళలు మరియు డిజిటల్ విద్యకు పెద్దపీట వేస్తారు. ఇంగ్లీష్ మీడియం బోధనతో పాటు ఫిజిక్స్, కెమిస్ట్రీ, బయాలజీ ల్యాబ్లు, కంప్యూటర్ ల్యాబ్, అటల్ టింకరింగ్ ల్యాబ్, లైబ్రరీ మరియు మోడరన్ కిచెన్ వంటి సౌకర్యాలు ఉంటాయి.
స్కూళ్ల ఎంపిక జరిగిన ప్రాంతాలు:
హన్మకొండ జిల్లా:
• కాజీపేట ప్రభుత్వ హైస్కూల్ (బాయ్స్) – వరంగల్ పశ్చిమ నియోజకవర్గం.
• ధర్మసాగర్ మండలం నారాయణగిరి జెడ్పీహెచ్ఎస్ – స్టేషన్ ఘన్పూర్ నియోజకవర్గం.
• హసన్పర్తి ప్రభుత్వ గర్ల్స్ హైస్కూల్ – వర్ధన్నపేట నియోజకవర్గం.
• నీరుకుళ్ల జెడ్పీహెచ్ఎస్ (ఆత్మకూరు మండలం) – పరకాల నియోజకవర్గం.
వరంగల్ జిల్లా:
• నర్సంపేట ప్రభుత్వ హైస్కూల్.
• శంభునిపేట జెడ్పీహెచ్ఎస్ – తూర్పు నియోజకవర్గం.
ఈ పాఠశాలల నిర్మాణ బాధ్యతలను పేరెంట్స్ కమిటీలకు అప్పగించనున్నారు. హెడ్ మాస్టర్ కన్వీనర్గా, ఒక ఇంజనీర్ మరియు 24 మంది తల్లిదండ్రులు సభ్యులుగా ఈ కమిటీ ఉంటుంది.
రంగారెడ్డి జిల్లాలోని ఆరుట్ల తెలంగాణ పబ్లిక్ స్కూల్ను మోడల్గా తీసుకుని వీటిని తీర్చిదిద్దనున్నారు. దీనికి సంబంధించి ప్రభుత్వం 15 రోజుల్లో అధికారిక ఉత్తర్వులు జారీ చేయనున్నట్లు విద్యాశాఖ అధికారులు వెల్లడించారు.