నర్సంపేట: అంబులెన్స్లో ఆసుపత్రికి వెళ్తున్న రోగి ప్రాణాలు తృటిలో తప్పాయి. నర్సంపేట-వరంగల్ ప్రధాన రహదారిపై ఒక అనూహ్య ప్రమాదం చోటుచేసుకుంది. వేగంగా వెళ్తున్న 108 అంబులెన్స్పై ఒక్కసారిగా భారీ చెట్టు విరిగిపడింది. అయితే, అదృష్టవశాత్తూ అందరూ స్వల్ప గాయాలతో ప్రాణాలతో బయటపడటంతో పెద్ద ప్రమాదం తప్పినట్లయింది.
అసలేం జరిగిందంటే..?
నర్సంపేట మండలం లక్నేపల్లి శివారులోకి రాగానే ఈ ఘోర ప్రమాదం జరిగింది. ఒక అత్యవసర రోగిని తీసుకుని నర్సంపేట నుంచి వరంగల్ ఆసుపత్రికి అంబులెన్స్ వేగంగా దూసుకుపోతోంది. సరిగ్గా లక్నేపల్లి దాటుతున్న క్రమంలో రోడ్డు పక్కన ఉన్న ఒక పెద్ద చెట్టు ప్రమాదవశాత్తు అంబులెన్స్ పైకి ఒక్కసారిగా కూలిపోయింది.
ప్రాణాలతో బయటపడ్డ పేషెంట్, డ్రైవర్
చెట్టు పడటంతో వాహనం పైభాగం కొంత దెబ్బతిన్నప్పటికీ, డ్రైవర్ అప్రమత్తత, అదృష్టం బాగుండటంతో లోపల ఉన్న రోగి, వారి బంధువులతో పాటు డ్రైవర్ కూడా కేవలం స్వల్ప గాయాలతోనే బయటపడ్డారు. ప్రమాదం జరిగిన వెంటనే స్థానికులు స్పందించి లోపల ఉన్నవారిని సురక్షితంగా బయటకు తీశారు.
రోగి పరిస్థితిని గమనించిన అక్కడి వారు, వెంటనే మరో ప్రత్యామ్నాయ వాహనాన్ని ఏర్పాటు చేసి, ఎలాంటి ఆలస్యం జరగకుండా పేషెంట్ను వరంగల్ ఆసుపత్రికి తరలించారు.