వినాయక చవితి పండుగకు సమయం దగ్గరపడుతున్న నేపథ్యంలో అమెరికాలోని ప్రవాస భారతీయులకు కమ్యూనిటీ పెద్దల నుంచి కీలక సూచనలు వెలువడుతున్నాయి. పండుగ వేడుకలను బహిరంగ ప్రదేశాల్లో భారీగా నిర్వహించకుండా ఇళ్లలోనే కుటుంబ సభ్యులతో ప్రశాంతంగా జరుపుకోవాలని సూచిస్తూ ఎన్ఆర్ఐ గ్రూపుల్లో సందేశాలు వైరల్ అవుతున్నాయి.
బహిరంగ వేడుకలకు దూరంగా ఉండాలని సూచన:
అపార్ట్‌మెంట్లు, కాలనీలు, రోడ్లు లేదా ఇతర పబ్లిక్ ప్రాంతాల్లో పెద్ద సంఖ్యలో గుమిగూడి వేడుకలు నిర్వహించవద్దని సూచించారు. ఎవరైనా వేడుకలకు ఆహ్వానిస్తే.. తాము ఇంట్లోనే పండుగ జరుపుకుంటామని సున్నితంగా చెప్పాలని కోరారు. భారీ మండపాలు ఏర్పాటు చేయడం, పెద్ద శబ్దాలతో కార్యక్రమాలు నిర్వహించడం, రోడ్లపై రద్దీ సృష్టించడం వంటి వాటికి దూరంగా ఉండాలని పేర్కొన్నారు.
సోషల్ మీడియా పోస్టులపైనా సూచనలు:
కంటెంట్ క్రియేటర్లు కూడా వేడుకలకు సంబంధించిన ఫొటోలు, వీడియోలు, గ్రూప్ వీడియోలను సోషల్ మీడియాలో పోస్ట్ చేయకుండా జాగ్రత్త వహించాలని సూచించారు. రోడ్డు పక్కన జరిగే కార్యక్రమాలను ఆన్‌లైన్‌లో షేర్ చేయకూడదని, నదులు లేదా జలాశయాల్లో నిమజ్జనం వంటి బహిరంగ కార్యక్రమాలకు దూరంగా ఉండాలని కోరారు.
వ్యతిరేకత పెరుగుతుందనే ఆందోళన :
అమెరికాలో భారతీయులపై కొన్ని వర్గాల్లో వ్యతిరేకత పెరుగుతున్న నేపథ్యంలో ఈ సూచనలు వచ్చినట్లు తెలుస్తోంది. బహిరంగ ప్రదేశాల్లో నిబంధనలకు విరుద్ధంగా జరిగే కార్యక్రమాలు స్థానికులతో వివాదాలకు దారితీసే అవకాశం ఉందని కమ్యూనిటీ పెద్దలు ఆందోళన వ్యక్తం చేస్తున్నారు.
కార్లోస్ టూర్సియోస్ వివాదాస్పద పోస్ట్ :
ఇటీవల టెక్సాస్‌కు చెందిన కన్జర్వేటివ్ కార్యకర్త కార్లోస్ టూర్సియోస్ షుగర్ ల్యాండ్‌లోని శ్రీ అష్టలక్ష్మి ఆలయానికి సంబంధించిన వీడియోను సోషల్ మీడియాలో పోస్ట్ చేయడం వివాదానికి దారితీసింది. భారతీయుల వలసను విమర్శిస్తూ ఆయన చేసిన వ్యాఖ్యలు అప్పట్లో తీవ్ర చర్చకు కారణమయ్యాయి. ఈ నేపథ్యంలో స్థానిక నిబంధనలు పాటిస్తూ శాంతియుతంగా పండుగ జరుపుకోవాలని ఎన్ఆర్ఐ కమ్యూనిటీ పెద్దలు సూచిస్తున్నారు