స్టేషన్ ఘనపూర్ | తేదీ: 08-04-2026
ఆరోగ్యవంతమైన తెలంగాణ నిర్మాణంలో అంగన్వాడీ కేంద్రాల పాత్ర కీలకమని ఎమ్మెల్యే కడియం శ్రీహరి మరియు వరంగల్ పార్లమెంట్ సభ్యురాలు డాక్టర్ కడియం కావ్య పేర్కొన్నారు.
అంగన్వాడీ టీచర్ల పనితీరును మెరుగుపరచడం, సేవలను మరింత సమర్థవంతంగా అందించేందుకు ఆధునిక సాంకేతికతతో కూడిన స్మార్ట్ ఫోన్లను పంపిణీ చేస్తున్నట్లు తెలిపారు.
స్టేషన్ ఘనపూర్ పట్టణంలోని ఎస్ కన్వెన్షన్లో మహిళా శిశు సంక్షేమ శాఖ ఆధ్వర్యంలో నిర్వహించిన కార్యక్రమంలో అంగన్వాడీ టీచర్లకు స్మార్ట్ ఫోన్లు పంపిణీ చేశారు. ముఖ్య అతిథులుగా హాజరైన ప్రజాప్రతినిధులు జ్యోతి ప్రజ్వలన చేసి కార్యక్రమాన్ని ప్రారంభించారు.
ఈ సందర్భంగా ఎంపీ డాక్టర్ కడియం కావ్య మాట్లాడుతూ, అంగన్వాడీ వ్యవస్థను ఆధునికీకరించే దిశగా ప్రభుత్వం తీసుకుంటున్న చర్యలు అభినందనీయమని అన్నారు. స్మార్ట్ ఫోన్ల వినియోగంతో పేపర్ వర్క్ తగ్గి, సేవలు వేగవంతం అవుతాయని పేర్కొన్నారు.
మహిళలు డిజిటల్ వినియోగంలో వెనుకబడి ఉన్న నేపథ్యంలో ఈ చర్య డిజిటల్ గ్యాప్ను తగ్గించడంలో సహాయపడుతుందని చెప్పారు. తల్లి–శిశు సంక్షేమంలో అంగన్వాడీ కేంద్రాల పాత్ర కీలకమని, చిన్నారుల ఆరోగ్యం, పోషణ, మానసిక అభివృద్ధిలో టీచర్ల పాత్ర ఎంతో ముఖ్యమని తెలిపారు.
ఆటిజం వంటి సమస్యలను ముందుగానే గుర్తించడంలో అంగన్వాడీ సిబ్బంది కీలకమని పేర్కొన్నారు. చిన్నారుల రక్షణ కోసం “గుడ్ టచ్ – బ్యాడ్ టచ్” వంటి అవగాహన కార్యక్రమాలు నిర్వహించాల్సిన అవసరం ఉందన్నారు.
మహిళల ఆరోగ్యంపై ప్రత్యేక శ్రద్ధ అవసరమని, ప్రతి ఆరు నెలలకు ఒకసారి ఆరోగ్య పరీక్షలు చేయించుకోవాలని సూచించారు. డిజిటల్ టెక్నాలజీ ద్వారా అంగన్వాడీ సేవలు మరింత పారదర్శకంగా మారుతాయని, లబ్ధిదారులకు నాణ్యమైన సేవలు అందించగలుగుతామని తెలిపారు.
ఎమ్మెల్యే కడియం శ్రీహరి మాట్లాడుతూ, పిల్లలకు పౌష్టికాహారం అందించడంలో అంగన్వాడీల పాత్ర కీలకమని అన్నారు. నియోజకవర్గంలో మొత్తం 349 అంగన్వాడీ కేంద్రాలు ఉన్నాయని, అందులో 108 కేంద్రాలకు స్వంత భవనాలు లేవని తెలిపారు.
ఈ కేంద్రాలకు నెల రోజుల్లో భవనాలు మంజూరు చేసి, ఏడాది లోపు నిర్మాణం పూర్తి చేస్తామని హామీ ఇచ్చారు. 100 శాతం అంగన్వాడీ కేంద్రాలకు స్వంత భవనాలు నిర్మించి నియోజకవర్గాన్ని రాష్ట్రానికి ఆదర్శంగా నిలపాలని లక్ష్యంగా పెట్టుకున్నట్లు చెప్పారు.
అంగన్వాడీ కేంద్రాల్లో ప్రీ-స్కూల్స్ ఏర్పాటు చేసి ఇంగ్లీష్ మీడియం బోధన అందించేందుకు చర్యలు తీసుకుంటున్నట్లు వెల్లడించారు.
పిల్లలను స్వంత బిడ్డలుగా చూసుకుంటూ వారి ఆరోగ్యం, అభివృద్ధిపై ప్రత్యేక శ్రద్ధ తీసుకోవాలని టీచర్లకు సూచించారు.
ఈ కార్యక్రమంలో స్థానిక ప్రజాప్రతినిధులు, అధికారులు, అంగన్వాడీ సిబ్బంది పాల్గొన్నారు.