వరంగల్ లోని చారిత్రక భద్రకాళి దేవాలయం సినీ సందడితో కళకళలాడింది. విడుదలకు సిద్ధంగా ఉన్న ‘బ్యాండ్ మేళం’ చిత్ర బృందం బుధవారం అమ్మవారిని దర్శించుకుంది. దర్శకుడు సతీష్ జవ్వాజి, ప్రధాన నటీనటులు హరీష్ రోషన్, శ్రీదేవి అమ్మవారి సన్నిధిలో ప్రత్యేక పూజలు నిర్వహించి, మొక్కులు చెల్లించుకున్నారు. మార్చి 26న సినిమా ప్రేక్షకుల ముందుకు రానున్న నేపథ్యంలో, ఈ చిత్రం భారీ విజయం సాధించాలని వారు అమ్మవారిని ప్రార్థించారు.

చిత్ర బృందం ఆలయానికి రావడంతో అభిమానులు, భక్తులు వారితో సెల్ఫీలు దిగేందుకు పోటీ పడ్డారు. ఆలయ అర్చకులు చిత్ర యూనిట్‌కు తీర్థప్రసాదాలు అందించి, వేదాశీర్వచనం చేశారు. సక్సెస్ ఫుల్ ప్రమోషన్లతో దూసుకుపోతున్న ఈ మూవీపై ప్రేక్షకుల్లో మంచి అంచనాలు ఉన్నాయి.