హైదరాబాద్ అసెంబ్లీ | 29/03/26
తెలంగాణ అసెంబ్లీలో ఉద్రిక్త పరిస్థితులు నెలకొన్నాయి. బడ్జెట్పై చర్చను అడ్డుకున్న నేపథ్యంలో బీఆర్ఎస్ ఎమ్మెల్యేలను స్పీకర్ గడ్డం ప్రసాద్ సస్పెండ్ చేశారు. ప్రస్తుత అసెంబ్లీ సెషన్ ముగిసేంత వరకు ఈ సస్పెన్షన్ అమల్లో ఉంటుందని స్పష్టం చేశారు.
అలాగే, ఎమ్మెల్యే కడియం శ్రీహరి పట్ల అనుచితంగా ప్రవర్తించిన ఘటనపై బీఆర్ఎస్ ఎమ్మెల్యే పాడి కౌశిక్ రెడ్డి వ్యవహార శైలిని అసెంబ్లీ ఎథిక్స్ కమిటీ పరిశీలించనుంది.
కౌశిక్ రెడ్డిపై చర్యలకు డిమాండ్
కడియం శ్రీహరిని బెదిరించే విధంగా ప్రవర్తించారని కాంగ్రెస్ ఆరోపించింది. ఈ నేపథ్యంలో పాడి కౌశిక్ రెడ్డిని బర్తరఫ్ చేయాలని డిమాండ్ చేసింది.
ఈ విషయంపై స్పందించిన సీఎం రేవంత్ రెడ్డి, కౌశిక్ రెడ్డి ప్రవర్తనను తీవ్రంగా ఖండించారు. ఈ ఘటనను సుమోటోగా తీసుకుని ఎథిక్స్ కమిటీ ద్వారా కఠిన చర్యలు తీసుకోవాలని సూచించారు. భవిష్యత్లో ఇలాంటి ఘటనలు పునరావృతం కాకుండా చర్యలు ఉండాలని ఆయన అన్నారు.