జయశంకర్ భూపాలపల్లి: తెలంగాణ ముఖ్యమంత్రి ఎనుముల రేవంత్ రెడ్డి నేడు జయశంకర్ భూపాలపల్లి జిల్లాలో పర్యటించనున్నారు. ఈ పర్యటనలో భాగంగా పలు అభివృద్ధి పనులకు శంకుస్థాపనలు చేయడంతో పాటు, రైతులకు మేలు చేకూర్చే రెండో విడత రైతు భరోసా నిధులను విడుదల చేయనున్నారు.

మధ్యాహ్నం 3 గంటలకి సీఎం రేవంత్ రెడ్డి కాళేశ్వరం చేరుకుంటారు. అక్కడ కాళేశ్వర ముక్తేశ్వర స్వామిని దర్శించుకుని ప్రత్యేక పూజలు నిర్వహిస్తారు. అనంతరం ఆలయ అభివృద్ధి పనులకు శంకుస్థాపన చేస్తారు.

 సాయంత్రం 4 గంటలకు మేడిగడ్డ బ్యారేజీని సందర్శిస్తారు. ఈ సందర్భంగా ఇరిగేషన్ శాఖ అధికారులతో ప్రాజెక్టు స్థితిగతులు మరియు ఇతర సాగునీటి అంశాలపై కీలక సమీక్ష నిర్వహిస్తారు.

 అనంతరం కాటారం మండలం నస్తూర్ పల్లిలో ఏర్పాటు చేసిన భారీ బహిరంగ సభలో సీఎం పాల్గొంటారు. ఈ వేదిక నుంచే ముఖ్యమంత్రి రెండో విడత రైతు భరోసా నిధులను అధికారికంగా విడుదల చేస్తారు.

ముఖ్యమంత్రి పర్యటన దృష్ట్యా జిల్లా పోలీసులు కట్టుదిట్టమైన భద్రతా ఏర్పాట్లు చేశారు. ఉమ్మడి జిల్లాల ఎస్పీలు సంకీర్త్, శబరీష్ ల పర్యవేక్షణలో భారీ బందోబస్తును ఏర్పాటు చేశారు.

డీఎస్పీలు  20 మంది, సీఐలు 50 మంది, ఎస్సైలు 115 మంది సుమారు 1,500 మంది పోలీసు సిబ్బందిలతో కట్టుదిట్టమైన భద్రతను పర్యవేక్షిస్తున్నారు.

ఎలాంటి అవాంఛనీయ సంఘటనలు జరగకుండా నిఘా పెంచామని, సభా ప్రాంగణం మరియు పర్యటన ప్రాంతాల్లో నిరంతరం పర్యవేక్షిస్తున్నామని పోలీస్ యంత్రాంగం వెల్లడించింది. సీఎం రాక కోసం ఇప్పటికే నస్తూర్ పల్లిలో భారీ బహిరంగ సభకు సంబంధించిన ఏర్పాట్లు పూర్తయ్యాయి.