రేవూరి ప్రకాశ్ రెడ్డి ఆధ్వర్యంలో శుక్రవారం పరకాల పట్టణంలోని ఎమ్మెల్యే క్యాంపు కార్యాలయంలో ముఖ్యమంత్రి సహాయ నిధి CMRF చెక్కుల పంపిణీ కార్యక్రమం నిర్వహించారు. ఈ కార్యక్రమంలో పరకాల టౌన్ తో పాటు పరకాల, నడికూడా, ఆత్మకూరు, దామెర మండలాలకు చెందిన అర్హులైన లబ్ధిదారులకు సీఎంఆర్ఎఫ్ చెక్కులను అందజేశారు.

ఈ సందర్భంగా ఎమ్మెల్యే రేవూరి ప్రకాశ్ రెడ్డి మాట్లాడుతూ..”మొత్తం 58 మంది లబ్ధిదారులకు 24 లక్షల27వేల 750 రుపాయిల విలువగల ముఖ్యమంత్రి సహాయనిధి చెక్కులను పంపిణీ చేసినట్లు తెలిపారు. ఆర్థిక ఇబ్బందులతో పాటు అనారోగ్య సమస్యలతో బాధపడుతున్న పేద కుటుంబాలకు వైద్య ఖర్చులకోసం ప్రభుత్వం అండగా నడుస్తుందన్నారు. ప్రజలకు పార్టీలకు అతీతంగా సంక్షేమ పథకాలు అందించడం కాంగ్రెస్ ప్రభుత్వ ప్రధాన లక్ష్యమని ఆయన పేర్కొన్నారు.

రాష్ట్రంలో కాంగ్రెస్ ప్రభుత్వం చేపడుతున్న పథకాలలో పరకాల ఇందిరా మహిళ డైరీ , ఇండియా ఇంటిగ్రేటెడ్ స్కూల్స్, నూతన రేషన్ కార్డుల పంపిణీ, 200 యూనిట్ల ఉచిత విద్యుత్, రైతు రుణమాఫీ, ఇందిరమ్మ ఆత్మీయ భరోసా ,మహాలక్ష్మి పథకం, గ్యాస్ సబ్సిడీ, శ్రీనిధి రుణాలు వంటి పథకాలు ప్రజలకు ఎంతో ఉపయోగపడుతున్నాయి అని ఎమ్మెల్యే వివరించారు. ఈ కార్యక్రమంలో స్థానిక ప్రజా ప్రతినిధులు, కాంగ్రెస్ పార్టీ నాయకులు, అధికారులు, లబ్ధిదారులు తదితరులు పాల్గొన్నారు..!