ఆఫ్రికా దేశాల్లో ప్రాణాంతక ఎబోలా (Ebola) వైరస్ మళ్లీ వ్యాప్తి చెందుతున్న నేపథ్యంలో కేంద్ర ప్రభుత్వం అప్రమత్తమైంది. ముందస్తు జాగ్రత్త చర్యల్లో భాగంగా ఢిల్లీలోని ఇందిరాగాంధీ అంతర్జాతీయ విమానాశ్రయంలో ప్రత్యేక ఆరోగ్య భద్రతా ఏర్పాట్లు చేపట్టింది. కేంద్ర ఆరోగ్య మరియు కుటుంబ సంక్షేమ మంత్రిత్వ శాఖ పరిధిలోని డీజీహెచ్ఎస్ (DGHS) ప్రయాణికుల కోసం తాజా హెల్త్ అడ్వైజరీ జారీ చేసింది.
ప్రపంచ ఆరోగ్య సంస్థ (WHO) నివేదికల ఆధారంగా డెమొక్రటిక్ రిపబ్లిక్ ఆఫ్ కాంగో, ఉగాండా, దక్షిణ సూడాన్ దేశాలను హై-రిస్క్ దేశాలుగా గుర్తించారు. ఈ దేశాల నుంచి వచ్చే లేదా అక్కడి మీదుగా ప్రయాణించిన వారికి ఢిల్లీ ఎయిర్పోర్టులో ప్రత్యేక స్క్రీనింగ్ పరీక్షలు నిర్వహిస్తున్నారు.
ప్రయాణికుల్లో జ్వరం, వాంతులు, విరేచనాలు, తీవ్రమైన నీరసం, తలనొప్పి, కండరాల నొప్పులు, గొంతునొప్పి లేదా అసాధారణ రక్తస్రావం వంటి లక్షణాలు కనిపిస్తే వెంటనే ఎయిర్పోర్ట్ హెల్త్ డెస్క్కు సమాచారం ఇవ్వాలని అధికారులు సూచించారు.
అలాగే భారత్కు చేరుకున్న తర్వాత 21 రోజుల పాటు ఆరోగ్య పరిస్థితిని గమనిస్తూ, అనుమానాస్పద లక్షణాలు ఉంటే తక్షణమే వైద్యులను సంప్రదించాలని కేంద్రం హెచ్చరించింది.
విదేశాల నుండి వచ్చే ప్రయాణికులు విమానాశ్రయాల్లో నిబంధనలు పాటించాలని, ఆరోగ్య పరీక్షలకు సహకరించాలని అధికారులు సూచించారు.
