వరంగల్ కార్పొరేషన్: నగరంలోని న్యూ శాయంపేట జంక్షన్ లో సర్వేనెంబర్ 23లో ఉన్న ఐదు ఎకరాల స్థలం ప్రభుత్వానికి చెందినది అని అధికారులు స్పష్టం చేశారు.
ఈ స్థలంలో సోమవారం రాత్రి కొందరు వ్యక్తులు హనుమాన్ విగ్రహాన్ని ఏర్పాటు చేయగా.. అదే రోజు రాత్రి తొలగించిన విషయం అందరికీ తెలిసిందే.
దీనిపై హనుమాన్ భక్తులు అదే విధంగా స్థానికులు మంగళవారం న్యూ శాయంపేట జంక్షన్ లో ఆందోళనకు కూడా దిగారు.
దీంతో కాసేపు అక్కడ ఉద్రిక్త వాతావరణం నెలకొంది. సమయానికి పోలీసులు చేరుకొని అంతా పరిస్థితిని చక్కదిద్దారు.
ఈ క్రమంలో వారిని పోలీసులు అదుపులోకి తీసుకొని సొంత పూచికత్తుపై వదిలేశారు.
ఈ విషయానికి సంబంధించి జిడబ్ల్యుఎంసి, రెవెన్యూ అధికారులు మాట్లాడుతూ.. “సర్వే నెంబర్ 23లో ఐదు ఎకరాల ప్రభుత్వ స్థలం ఉంది అని..
ఇందులో కొంత గుట్ట ప్రాంతం ఉండగా.. అక్కడ కూలీలు గుట్టను తొలగించి జీవనోపాధి పొందాలని తెలిపారు”.
ఆ తర్వాత గుట్ట కింద తేలిన భూమితో పాటు పక్కనే ఉన్న ఖాళీ స్థలంలో రెండు రోజుల క్రిందట కొందరు గుర్తుతెలియని వ్యక్తులు దేవుడు విగ్రహాన్ని ఏర్పాటు చేశారు అని…
సమాచారం అందుకున్న వెంటనే రెవెన్యూ జిడబ్ల్యూఎంసి, డిఆర్ఎస్ పోలీసు సిబ్బంది రంగంలోకి దిగి సుమారు 20 కోట్ల ప్రభుత్వ భూమిని రక్షించడం జరిగింది అని తెలిపారు.
ఇది పక్కా ప్రభుత్వ భూమి అని చెప్పారు. కబ్జా చేయాలని చూస్తే చట్టపరమైన చర్యలు తప్పవని హెచ్చరించారు.
న్యూ శాయం పేట గ్రామ పరిధిలోని సర్వేనెంబర్ 23లో ఉన్న విలువైన ప్రభుత్వ బంచరాయి భూమిని సమన్వయంతో పరీక్షించినట్లు కాజీపేట తహసీల్దార్ రాజు ఒక ప్రకటనలో తెలిపారు.
ఈ భూమిలో గతంలో అక్రమ మైనింగ్ నిర్వహించడంతోపాటు భారీ గుంతలు ఏర్పడి భూమి నిరుపయోగ స్థితికి చేరుకుందని..
అనంతరం భద్రకాళి చెరువు పూడిక మట్టిని ఉపయోగించి ఆ గుంతలను పూడ్చి ప్రజాప్రయోజనార్థం ఉపయోగపడే విధంగా అభివృద్ధి చేసినట్లు తెలిపారు.
కానీ కొందరు వ్యక్తులు ముందస్తు అనుమతులు పొందకుండా దేవాలయం పేరుతో భూమిని ఆక్రమించేందుకు ప్రయత్నించినట్లు గుర్తించామని..
ఈ విషయాన్ని తీవ్రంగా పరిగణించి రెవెన్యూ అధికారులు, పోలీసు శాఖ పరస్పర సమన్వయంతో తక్షణ చర్యలు చేపట్టి ప్రభుత్వ భూమిని రక్షించడం జరిగింది అని తెలిపారు.
కొందరు వ్యక్తులు ప్రభుత్వ భూమి కబ్జాకు యత్నించడమే కాకుండా వివాదాస్పద పరిస్థితులు సృష్టించి ప్రజలకు అసౌకర్యం కలిగించిన నేపథ్యంలో వారిపై సుబేదారి పోలీస్ స్టేషన్లో ఫిర్యాదు చేయడం జరిగిందని కూడా తహసీల్దార్ తెలిపారు.