జయశంకర్ భూపాలపల్లి జిల్లాలో విషాదకరమైన ఘటన చోటుచేసుకుంది. పొలంలో వరి కొయ్యకాళ్లని కాల్చేందుకు పెట్టిన మంటలు అదుపుతప్పడంతో రైతు ప్రాణాలు కోల్పోయాడు. ఈ దుర్ఘటన రేగొండ మండలంలోని రేపాకపల్లి గ్రామంలో శనివారం జరిగింది.

గ్రామానికి చెందిన చంద్రమౌళి అనే రైతు తన వ్యవసాయ భూమిలో వరి కొయ్య కాళ్ళని తగలబెట్టాడు. అయితే గాలి వేగం కారణంగా మంటలు ఒక్కసారిగా పక్కనే ఉన్న పొలాల వైపు వ్యాపించాయి. దీంతో మంటలు విస్తరిస్తుండడాని గమనించిన చంద్రమౌళి వెంటనే వాటిని ఆర్పేందుకు ప్రయత్నించాడు. ఈ క్రమంలో అతను ఆందోళనతో పరుగులు తీస్తూ ప్రమాదవశాత్తు మంటల్లా మధ్యలో పడిపోయాడు.

మంటలు వేగంగా వ్యాపించడంతో బయటకు రాలేక అక్కడే సజీవదహనమయ్యాడు. ఘటనను గమనించిన స్థానిక రైతులు గ్రామస్తులు వెంటనే సహాయక చర్యలకు దిగిన అప్పటికే ఆయన ప్రాణాలు కోల్పోయాడు. దీంతో జయశంకర భూపాలపల్లి జిల్లాలో విషాదం చోటుచేసుకుంది. సమాచారం అందుకున్న పోలీసులు వెంటనే ఘటనా స్థలికి చేరుకొని అగ్నిమాపక చర్యలు చేపట్టారు.

అనంతరం మంటలను అదుపులోకి తీసుకొని ఘటనపై విచారణ ప్రారంభించారు. రైతు మృతితో రేపాకపల్లి గ్రామంలో విషాద ఛాయలు అలముకున్నాయి. కుటుంబ సభ్యులు, గ్రామస్తులు కన్నీరు మున్నీరుగా విలపిస్తున్నారు. వ్యవసాయ పనుల్లో అప్రమత్తత ఎంత ముఖ్యమో ఈ ఘటన మరొకసారి గుర్తు చేసిందని స్థానికులు ఆవేదన వ్యక్తం చేస్తున్నారు.