నిద్రలో పదేపదే మేల్కొంటున్నారా? మీ శరీరం చెప్తుందే ఇదే.. :
రాత్రిపూట నిద్రలో పదేపదే మెలకువ రావడం సాధారణ సమస్యగా అనిపించినా, దాన్ని నిర్లక్ష్యం చేయకూడదు. ఒత్తిడి, ఆందోళన, జీవనశైలి, పడకగది వాతావరణం వంటి అనేక అంశాలు నిద్ర నాణ్యతను ప్రభావితం చేస్తాయి. రోజంతా ఎదురైన సమస్యలు, ఆందోళనలు పడుకునే సమయంలోనూ కొనసాగితే నిద్రకు ఆటంకం కలుగుతుంది. అలాగే గదిలో ఎక్కువ కాంతి లేదా శబ్దం, అసౌకర్యమైన పరుపు, దిండు, గది ఉష్ణోగ్రత వంటి అంశాలు కూడా నిద్రను దెబ్బతీయవచ్చు. సాయంత్రం తర్వాత టీ, కాఫీ వంటి కెఫిన్‌ పానీయాలను ఎక్కువగా తీసుకోవడం, మద్యం సేవించడం వల్ల కూడా రాత్రి నిద్ర మధ్యలో మెలకువ రావచ్చు.
ఇతర ఆరోగ్య సమస్యల ప్రభావం :
తరచూ మూత్రవిసర్జన, శరీర నొప్పులు, కొన్ని మందుల ప్రభావం లేదా ఇతర ఆరోగ్య సమస్యలు కూడా నిద్రకు అంతరాయం కలిగించవచ్చు. తరచూ మేల్కొనడం, మేల్కొన్న తర్వాత తిరిగి నిద్రపట్టకపోవడం వంటివి నిద్రలేమి లక్షణాల్లో భాగం. దీర్ఘకాలంలో పగటిపూట అలసట, చిరాకు, ఏకాగ్రత, జ్ఞాపకశక్తి సమస్యలు ఎదురయ్యే అవకాశం ఉంటుంది.
గురకతో పాటు శ్వాస ఆగుతుందా? :
బిగ్గరగా గురక పెట్టడం, నిద్రలో శ్వాస ఆగినట్లు అనిపించడం, ఊపిరి కోసం ఒక్కసారిగా మేల్కొనడం వంటి లక్షణాలు ఉంటే స్లీప్‌ అప్నియాను కూడా పరిగణించాలి. ఉదయం తలనొప్పి, పగటిపూట అధిక నిద్రమత్తు కూడా కనిపించవచ్చు.
మంచి నిద్ర కోసం ఏం చేయాలి? :
ప్రతిరోజూ ఒకే సమయానికి నిద్రపోవడం, మేల్కొనడం అలవాటు చేసుకోవాలి. పగటిపూట శారీరక శ్రమ చేయడం, పడుకునే ముందు మొబైల్‌, టీవీ వినియోగాన్ని తగ్గించడం, సాయంత్రం తర్వాత కెఫిన్‌ను పరిమితం చేయడం మంచిది. పడకగదిని నిశ్శబ్దంగా, చీకటిగా, సౌకర్యవంతంగా ఉంచాలి.
నిద్ర సమస్య తరచూ కొనసాగి రోజువారీ జీవితాన్ని ప్రభావితం చేస్తే వైద్యుడిని సంప్రదించడం మంచిది. ముఖ్యంగా గురక, శ్వాస ఆగిపోవడం, పగటిపూట అధిక నిద్రమత్తు ఉంటే స్లీప్‌ అప్నియా పరీక్ష అవసరమా అనే విషయాన్ని వైద్యుడితో చర్చించాలి.