గీసుగొండ, వరంగల్: ప్రేమిస్తున్నానని నమ్మించి, పెళ్లి చేసుకుంటానని మోసం చేసి యువతిపై లైంగిక దాడికి పాల్పడిన ఘటనలో నిందితుడిని గీసుగొండ పోలీసులు అరెస్ట్ చేశారు. గీసుగొండ సీఐ విశ్వేశ్వర్ తెలిపిన వివరాల ప్రకారం కేసు వివరాలు ఇలా ఉన్నాయి..
మనుగొండ గ్రామానికి చెందిన తుప్పరి ఉదయ్ శంకర్ (29) అనే యువకుడు బాధిత యువతితో పదో తరగతి నుంచే పరిచయం పెంచుకున్నాడు. ఆమెను ప్రేమిస్తున్నానని, పెళ్లి చేసుకుంటానని నమ్మించాడు.
పెళ్లి పేరుతో నమ్మించి, ఆపై బెదిరింపులకు గురిచేస్తూ బాధితురాలిపై పలుమార్లు బలవంతంగా లైంగిక దాడికి పాల్పడ్డాడు. తనను పెళ్లి చేసుకోవాలని బాధితురాలు కోరగా.. వారిద్దరూ కలిసి ఉన్న ఫోటోలను సోషల్ మీడియాలో పెడతానని, కుటుంబ సభ్యులను చంపేస్తానని నిందితుడు బెదిరింపులకు దిగాడు.
అరెస్ట్ జరిగిన తీరు:
ఏప్రిల్ 24వ తేదీ రాత్రి నిందితుడు ఉదయ్ శంకర్ బాధితురాలి ఇంట్లోకి అక్రమంగా ప్రవేశించగా, స్థానికులు పట్టుకుని నిలదీశారు. ఆ సమయంలో కూడా పెళ్లి చేసుకుంటానని నమ్మబలికాడు. అయితే, మరుసటి రోజు బాధితురాలి కుటుంబ సభ్యులు నిందితుడి ఇంటికి వెళ్లి మాట్లాడగా.. నిందితుడితో పాటు అతని తండ్రి సమ్మయ్య, అక్క అన్నపూర్ణ కలిసి బాధితులను దూషించి, చంపుతామని బెదిరించారు.
బాధితురాలి ఫిర్యాదు మేరకు కేసు నమోదు చేసిన పోలీసులు, పరారీలో ఉన్న ఉదయ్ శంకర్ను మంగళవారం సాయంత్రం ఊకల్లు క్రాస్ రోడ్డు వద్ద అరెస్ట్ చేసి రిమాండ్కు తరలించారు.