వరంగల్‌లోని చారిత్రక భద్రకాళి అమ్మవారి దేవాలయాన్ని ఆంధ్రప్రదేశ్ ఉప ముఖ్యమంత్రి, జనసేన పార్టీ అధినేత పవన్ కళ్యాణ్ సందర్శించారు. ఈ సందర్భంగా ఆలయ అర్చకులు, దేవస్థాన అధికారులు ఆయనకు పూర్ణకుంభంతో స్వాగతం పలికారు.

పవన్ కళ్యాణ్ ఆలయంలో ప్రత్యేక పూజలు నిర్వహించి అమ్మవారి ఆశీస్సులు పొందారు. ఆయన రాకతో ఆలయ ప్రాంగణంలో భక్తులు, జనసేన కార్యకర్తలు భారీ సంఖ్యలో తరలివచ్చారు. దీంతో కొంతసేపు ఆలయ పరిసరాల్లో రద్దీ నెలకొంది.

పవన్ కళ్యాణ్‌ను దగ్గరగా చూసేందుకు అభిమానులు పోటీపడటంతో స్వల్ప తోపులాట చోటుచేసుకుంది. పరిస్థితిని అదుపులోకి తీసుకురావడానికి పోలీసులు, భద్రతా సిబ్బంది రంగంలోకి దిగారు. అనంతరం పరిస్థితి సద్దుమణిగింది.

పవన్ కళ్యాణ్ దర్శనం అనంతరం ఆలయ అభివృద్ధి, భక్తులకు మెరుగైన సౌకర్యాల కల్పనపై ఆలయ అధికారులతో చర్చించినట్లు సమాచారం.