యూపీఎస్సీ సివిల్ సర్వీసెస్ ప్రిలిమినరీ పరీక్షలు ఆదివారం జిల్లా వ్యాప్తంగా ప్రశాంతంగా నిర్వహించబడుతున్న నేపథ్యంలో హన్మకొండ జిల్లాలో ఏర్పాటు చేసిన పలు పరీక్షా కేంద్రాలను జిల్లా కలెక్టర్ చాహత్ బాజ్ పాయి స్వయంగా సందర్శించి పరిశీలించారు. అభ్యర్థులకు ఎలాంటి ఇబ్బందులు తలెత్తకుండా అన్ని ఏర్పాట్లు సక్రమంగా జరిగాయా అనే దానిపై ప్రత్యేక దృష్టి సారించారు.
హనుమకొండ ప్రభుత్వ జూనియర్ కళాశాల, ములుగు రోడ్డులోని శ్రీ గాయత్రి డిగ్రీ అండ్ పీజీ కళాశాల, ప్రభుత్వ పాలిటెక్నిక్ కళాశాల, ఎల్బీ కళాశాలతో పాటు బాలసముద్రంలోని నేషనల్ హై స్కూల్ (ఎస్సార్ ఎడ్యుకేషన్) వంటి ముఖ్య పరీక్షా కేంద్రాలను కలెక్టర్ తనిఖీ చేశారు. ప్రతి కేంద్రంలో పరీక్షల నిర్వహణ విధానం, భద్రతా చర్యలు, సీసీ కెమెరాల పర్యవేక్షణ, విద్యుత్ సరఫరా, తాగునీటి సౌకర్యం, వైద్య సేవలు, అభ్యర్థుల కోసం ఏర్పాటు చేసిన సహాయక కేంద్రాలపై అధికారులను అడిగి తెలుసుకున్నారు.
పరీక్షా కేంద్రాల్లో నిబంధనలు కచ్చితంగా అమలు చేయాలని, ఎలాంటి అవాంఛనీయ ఘటనలకు తావులేకుండా అప్రమత్తంగా ఉండాలని సూచించారు. పరీక్షా కేంద్రాల్లో వేసవి తీవ్రత దృష్ట్యా తాగునీరు, ఫ్యాన్లు, ప్రాథమిక వైద్య సదుపాయాలు అందుబాటులో ఉంచినట్లు చెప్పారు. ముఖ్యంగా దివ్యాంగ అభ్యర్థులకు ప్రత్యేక సహాయక సిబ్బందిని నియమించి అవసరమైన సౌకర్యాలు కల్పించినట్లు వెల్లడించారు.
పరీక్షా ప్రక్రియ పారదర్శకంగా, నిబంధనలకు అనుగుణంగా కొనసాగుతున్నదని కలెక్టర్ సంతృప్తి వ్యక్తం చేశారు. అధికారులు సమన్వయంతో పనిచేస్తూ పరీక్షలను విజయవంతంగా నిర్వహిస్తున్నారని ప్రశంసించారు.