ప్రజల సమస్యలను క్షేత్రస్థాయిలో తెలుసుకుని వాటిని పరిష్కరించడమే ప్రభుత్వ ప్రధాన లక్ష్యమని హనుమకొండ జిల్లా కలెక్టర్ చాహత్ బాజ్‌పాయ్ అన్నారు. మంగళవారం ఆమె దామెర మండలంలో విస్తృతంగా పర్యటించారు.

‘ప్రజా పాలన – ప్రగతి ప్రణాళిక’లో భాగంగా దామెర క్రాస్ రోడ్డులోని గురుకుల పాఠశాలను కలెక్టర్ సందర్శించారు. అక్కడ విద్యార్థులకు అందుతున్న వసతులు, భోజన నాణ్యతను స్వయంగా తనిఖీ చేసి, విద్యార్థులతో మాట్లాడారు. అనంతరం పులుకుర్తిలోని పామాయిల్ తోటలను పరిశీలించారు. ఈ సందర్భంగా క్షేత్రస్థాయిలో మొక్కలు నాటి, ఉద్యానవన పంటల సాగుపై రైతులకు అవగాహన కల్పించారు.

 మండల ప్రాథమిక ఆరోగ్య కేంద్రాన్ని (PHC) తనిఖీ చేసిన కలెక్టర్, ఆసుపత్రిలోని రిజిస్టర్లను పరిశీలించారు. రోగులతో నేరుగా మాట్లాడి వైద్యుల సేవలు, మందుల లభ్యత గురించి అడిగి తెలుసుకున్నారు. నాణ్యమైన వైద్య సేవలు అందించడంలో నిర్లక్ష్యం వహించవద్దని సిబ్బందిని ఆదేశించారు. ఈ పర్యటనలో స్థానిక మండల అధికారులు, రెవెన్యూ మరియు ఆరోగ్య శాఖ సిబ్బంది పాల్గొన్నారు.