హన్మకొండ జిల్లాలోని దివ్యాంగుల సంక్షేమంపై ప్రత్యేక దృష్టి సారించి, వారి చిరకాల వాంఛ అయిన కమ్యూనిటీ భవన నిర్మాణానికి తక్షణమే చర్యలు చేపట్టాలని నవ తెలంగాణ రాష్ట్ర వికలాంగుల సంఘం ప్రతినిధులు కోరారు. ఈ మేరకు శనివారం హన్మకొండ జిల్లా కలెక్టరేట్లో జిల్లా కలెక్టర్ చాహత్ బాజ్ పాయ్ గారిని కలిసి వినతిపత్రం అందజేశారు.
ఈ సందర్భంగా సంఘం నాయకులు మాట్లాడుతూ, జిల్లాలో వేలాది మంది దివ్యాంగులు ఉన్నారని, వారందరికీ ఉమ్మడిగా సమావేశాలు నిర్వహించుకోవడానికి లేదా శిక్షణా కార్యక్రమాలు చేపట్టడానికి సరైన వేదిక లేదని కలెక్టర్ దృష్టికి తీసుకెళ్లారు. హన్మకొండ జిల్లా కేంద్రంలో దివ్యాంగుల కోసం ఒక ప్రత్యేక కమ్యూనిటీ భవనాన్ని ఏర్పాటు చేయాలని వారు ప్రధానంగా విన్నవించారు.
అలాగే, ప్రభుత్వం నుంచి అందాల్సిన వివిధ సంక్షేమ పథకాలను క్షేత్రస్థాయిలో ఉన్న ప్రతి దివ్యాంగుడికి అందేలా చూడాలని కోరారు. దివ్యాంగులు ఎదుర్కొంటున్న వివిధ సమస్యల పరిష్కారం కోసం ప్రత్యేక యంత్రాంగాన్ని ఏర్పాటు చేసి, వారి సంక్షేమానికి అధిక ప్రాధాన్యత ఇవ్వాలని వారు ఈ సందర్భంగా డిమాండ్ చేశారు.
ఈ కార్యక్రమంలో నవ తెలంగాణ రాష్ట్ర వికలాంగుల సంఘం నాయకులు ఎండి. అజీమ్, శ్రీకాంత్ మరియు ఇతర సంఘ సభ్యులు, ప్రతినిధులు పెద్ద సంఖ్యలో పాల్గొన్నారు. సానుకూలంగా స్పందించిన కలెక్టర్, దివ్యాంగుల సమస్యల పరిష్కారానికి కృషి చేస్తామని హామీ ఇచ్చారు.