హన్మకొండ జిల్లాకు చెందిన ఒక సాధారణ యువతి అంతర్జాతీయ వేదికపై తన సత్తా చాటింది. ఉన్నత విద్య కోసం విదేశాలకు వెళ్ళిన ఆమె, అక్కడ రాజకీయాల్లో రాణించి కౌన్సిలర్గా ఎన్నికై వరంగల్ కీర్తిని ఖండాంతరాలు దాటించింది.
హన్మకొండ జిల్లా ఐనవోలు మండలం ఒంటిమామిడిపల్లికి చెందిన పూజిత శ్రీనివాస్ లండన్లోని రాయల్ ఆల్బర్ట్ వార్డు నుంచి గ్రీన్ పార్టీ అభ్యర్థిగా పోటీ చేసి కౌన్సిలర్గా విజయం సాధించింది.
పూజిత అత్తమామలు కూడా రాజకీయ నేపథ్యం ఉన్నవారే. ఆమె అత్త కడదూరి సరోజన మాజీ సర్పంచ్గా, మామ కడదూరి కుమారస్వామి మాజీ ఎంపీటీసీగా సేవలందించారు.
ఉన్నత చదువుల కోసం లండన్ వెళ్ళిన పూజిత, చదువుతో పాటు అక్కడి ప్రజాసేవలో చురుకుగా పాల్గొనేవారు. ఆ సేవా దృక్పథమే నేడు ఆమెను కౌన్సిలర్ పీఠంపై కూర్చోబెట్టింది. సొంత ఊరి అమ్మాయి లండన్ రాజకీయాల్లో చక్రం తిప్పడం పట్ల ఆమె గ్రామస్తులు మరియు వరంగల్ వాసులు ఎంతో హర్షం వ్యక్తం చేస్తున్నారు.