వరంగల్‌లో నిర్మాణంలో ఉన్న సూపర్ స్పెషాలిటీ హాస్పిటల్ పనులను మాజీ మంత్రి T Harish Rao పరిశీలించారు. అనంతరం మీడియాతో మాట్లాడుతూ రాష్ట్ర ప్రభుత్వంపై తీవ్ర స్థాయిలో విమర్శలు చేశారు.

బిఆర్ఎస్ ప్రభుత్వ హయాంలో 24 అంతస్తుల భవన నిర్మాణం పూర్తి చేసామని, నిధులు కూడా సమకూర్చామని తెలిపారు. ఫినిషింగ్ పనులు చేయడానికి ఇంత సమయం ఎందుకు పడుతోందని ప్రశ్నించారు. జూన్ 2న హాస్పిటల్ ప్రారంభిస్తామని చెప్పడం కేవలం ప్రకటనలకే పరిమితమైందన్నారు.

దేవాదుల ప్రాజెక్టుపై మాట్లాడుతూ, ముఖ్యమంత్రి సందర్శన తర్వాత మోటార్లు విడుదల చేయాలని ఇచ్చిన ఆదేశాలు బిఆర్ఎస్ పోరాట ఫలితమని పేర్కొన్నారు. కాంగ్రెస్ ప్రభుత్వం ఏర్పడినప్పటి నుంచి ఒక్క ఎకరా భూ సేకరణ కూడా చేయలేదని ఆరోపించారు. డెడ్‌లైన్లు మారుతున్నా పనులు ముందుకు సాగడం లేదని విమర్శించారు.

ముఖ్యమంత్రి Revanth Reddy పై కూడా తీవ్ర వ్యాఖ్యలు చేస్తూ, అసెంబ్లీలో మైక్ ఆపకుండా మాట్లాడే ధైర్యం ఉందా అని సవాల్ విసిరారు. గోదావరి ప్రాజెక్టుల విషయంలో బిఆర్ఎస్ ప్రభుత్వం పెద్దఎత్తున పనులు పూర్తి చేసిందని, కాంగ్రెస్ ప్రభుత్వం ఏమి చేసిందో చెప్పాలని ప్రశ్నించారు.

వరంగల్‌లో గుండె శస్త్రచికిత్సల సౌకర్యాలు లేక సామాన్య ప్రజలు ఇబ్బందులు పడుతున్నారని, MGM Hospital లో ఆక్సిజన్ యంత్రాలు సరిగా పనిచేయకపోవడం, మందుల కొరత, వైద్యుల కొరత ఉన్నాయని ఆరోపించారు.

హాస్పిటల్‌ను తక్షణమే ప్రజలకు అందుబాటులోకి తీసుకురాకపోతే అక్కడే ధర్నాకు దిగుతామని హెచ్చరించారు. గత టీఆర్‌ఎస్ ప్రభుత్వంలో ప్రారంభించిన ప్రతి పనిని పూర్తి చేయాలని డిమాండ్ చేశారు.

అదేవిధంగా ఔట్సోర్సింగ్ ఉద్యోగులకు వెంటనే వేతనాలు చెల్లించాలని, ఉద్యోగులకు పెండింగ్ పీఆర్‌సీ బకాయిలు అమలు చేయాలని కోరారు. జర్నలిస్టులకు హెల్త్ కార్డులు, అక్రిడిటేషన్ కార్డులు, ఇళ్ల స్థలాల విషయాల్లో ప్రభుత్వం వివక్ష చూపుతోందని ఆరోపించారు.