హన్మకొండ: నగరంలో మరోసారి చైన్ స్నాచర్లు రెచ్చిపోయారు. పట్టపగలే జనం తిరిగే ప్రాంతంలో మహిళను టార్గెట్ చేసి దొంగతనానికి పాల్పడటంతో స్థానికంగా భయాందోళనలు వ్యక్తమవుతున్నాయి.
హన్మకొండ నగరంలోని బొక్కలగడ్డ ప్రాంతంలో ఈరోజు ఉదయం ఈ ఘటన చోటుచేసుకుంది. సిటిజన్ ఫంక్షన్ హాల్ సమీపంలో ఓ మహిళ ఒంటరిగా నడుచుకుంటూ వెళ్తుండగా, బైక్పై వచ్చిన గుర్తుతెలియని వ్యక్తి మెరుపు వేగంతో ఆమె మెడలోని బంగారు గొలుసును తెంచుకుని పరారయ్యాడు.
బాధితురాలు తేరుకునేలోపే దుండగుడు అక్కడి నుండి మాయమవ్వడంతో, ఆమె వెంటనే పోలీసులకు సమాచారం అందించారు. సమాచారం అందుకున్న వెంటనే హన్మకొండ సీసీఎస్ పోలీసులు ఘటనా స్థలానికి చేరుకున్నారు. బాధితురాలి నుంచి వివరాలు సేకరించి, కేసు నమోదు చేసుకున్నారు.
నిందితుడిని పట్టుకోవడానికి ఆ ప్రాంతంలోని సీసీటీవీ ఫుటేజీలను పోలీసులు పరిశీలిస్తున్నారు. త్వరలోనే దొంగను పట్టుకుంటామని పోలీసులు ధీమా వ్యక్తం చేశారు. ఒంటరిగా వెళ్లే మహిళలు అప్రమత్తంగా ఉండాలని, అనుమానాస్పద వ్యక్తులు కనిపిస్తే వెంటనే డయల్ 100కు సమాచారం ఇవ్వాలని పోలీసులు సూచిస్తున్నారు.