హైదరాబాద్: మృగశిర కార్తెను పురస్కరించుకుని ఆస్తమా, శ్వాసకోశ వ్యాధిగ్రస్తుల కోసం ఏటా అందించే ప్రసిద్ధ ‘చేప ప్రసాదం’ పంపిణీకి సర్వం సిద్ధమైంది. హైదరాబాద్ నాంపల్లిలోని ఎగ్జిబిషన్ గ్రౌండ్స్లో రేపు (సోమవారం) రాత్రి 9 గంటల నుంచే ఈ ప్రసాదం పంపిణీ కార్యక్రమం అధికారికంగా ప్రారంభం కానుంది.
పటిష్ట బందోబస్తు.. మంత్రుల ఆదేశాలు
ఈ ఏడాది కూడా దేశం నలుమూలల నుండి భారీ సంఖ్యలో ప్రజలు తరలివచ్చే అవకాశం ఉండటంతో, భక్తులకు ఎలాంటి ఇబ్బందులు కలగకుండా ప్రభుత్వం అన్ని జాగ్రత్తలు తీసుకుంటోంది. పంపిణీ కేంద్రాల వద్ద క్యూలైన్లు, తాగునీరు, ఇతర కనీస వసతులపై మంత్రులు పొన్నం ప్రభాకర్, వాకిటి సునీతా లక్ష్మారెడ్డి ప్రత్యేక సమీక్ష నిర్వహించారు. ఎక్కడా తొక్కిసలాట జరగకుండా పటిష్టమైన భద్రతా ఏర్పాట్లు చేయాలని అధికారులను ఆదేశించారు.
40 వేల కొరమీను పిల్లలు సిద్ధం
చేప ప్రసాదం తయారీ కోసం మత్స్య శాఖ ఇప్పటికే 40 వేల కొరమీను (ముర్రెల్) చేప పిల్లలను సిద్ధం చేసింది. ప్రసాదం కోసం వచ్చే ప్రజల అవసరాలకు తగ్గట్టుగా వీటిని అందుబాటులో ఉంచారు.
ప్రయాణికుల కోసం ప్రత్యేక బస్సులు
వివిధ జిల్లాల నుండి, సుదూర ప్రాంతాల నుండి వచ్చే భక్తుల రవాణా సౌకర్యం కోసం ఆర్టీసీ ప్రత్యేక ఏర్పాట్లు చేసింది. నగరంలోని ప్రధాన రైల్వే స్టేషన్లు, బస్ స్టాండ్ల నుండి నాంపల్లి ఎగ్జిబిషన్ గ్రౌండ్స్కు నేరుగా ప్రత్యేక బస్సులను నడపనున్నట్లు అధికారులు వెల్లడించారు.
Read Warangal News and Latest Politics News and Real Estate