హైదరాబాద్ పోలీసింగ్ వ్యవస్థలో సరికొత్త సాంకేతిక విప్లవానికి శ్రీకారం చుట్టారు. దేశంలోనే తొలిసారిగా హైదరాబాద్ సిటీ పోలీస్ AI-CopWriter పేరుతో కృత్రిమ మేధా ఆధారిత మొబైల్ యాప్ ను ప్రవేశపెట్టింది. బంజారాహిల్స్‌లోని టీజీఐసీసీసీలో హైదరాబాద్ సీపీ V.C. Sajjanar ఈ యాప్‌ను ఆవిష్కరించారు. నగరంలోని 80కిపైగా పోలీస్ స్టేషన్లలో ఈ యాప్‌ను అందుబాటులోకి తీసుకురానున్నారు.

భాష సమస్యల వల్ల ఫిర్యాదులు నమోదు చేయడంలో ఎదురయ్యే ఇబ్బందులను తొలగించేందుకు ఈ యాప్ బాగా ఉపయోగపడుతుంది. తెలుగు, హిందీ, తమిళం, బెంగాలీ, మరాఠీ సహా 10కి పైగా భారతీయ భాషలను ఇది గుర్తించగలదు . బాధితులు తమ మాతృభాషలో చెప్పిన వివరాలను యాప్ వెంటనే టెక్స్ట్ రూపంలోకి మార్చి పోలీసులకు అర్థమయ్యే భాషలో అనువదిస్తుంది. దీంతో ఎఫ్ఐఆర్ నమోదు ప్రక్రియ వేగవంతం కానుంది.

ఫిర్యాదు నమోదు చేసిన అధికారి వివరాలు, సమయం వంటి సమాచారం ఆటోమెటిక్ గా పిడిఎఫ్ రూపంలో భద్రపరుస్తుంది. బాధితుడు, నిందితుడు, సాక్షుల మాటలను వేరువేరుగా గుర్తించి రికార్డ్ చేయగల సామర్థ్యం కూడా ఈ యాప్ లో ఉంది. బ్లూక్లౌడ్ సాఫ్టెక్ సొల్యూషన్స్ సంస్థ సహకారంతో ఈ ప్రాజెక్టును హైదరాబాద్ సిటీ పోలీస్ అభివృద్ధి చేసింది. ఇప్పటికే “సి-మిత్ర” ద్వారా సైబర్ క్రైమ్ ఫిర్యాదులలో ఏఐ వినియోగిస్తున్న హైదరాబాద్ పోలీసులు.. ఇప్పుడు ఈ కొత్త యాప్ తో పోలీసింగ్ లో మరింత పారదర్శకత వేగం తీసుకురావాలని లక్ష్యంగా పెట్టుకున్నారు.