ఫాలోవర్లను కట్టిపడేసే కొత్త టూల్..ఇన్స్టాగ్రామ్, ఫేస్బుక్లో ‘సిరీస్’ ఫీచర్ :
సోషల్ మీడియా దిగ్గజం “మెటా” తన ప్రముఖ ప్లాట్ఫామ్లైన ఇంస్టాగ్రామ్, ఫేస్ బుక్ లల్లో కొత్త సిరీస్ ఫీచర్ ని అందుబాటులోకి తీసుకురావడానికి సన్నాహాలు చేస్తుంది. ఈ ఫీచర్ ద్వారా క్రియేటర్లు తమ రీల్స్ ని ఒకే అంశానికి సంబంధించిన ఎపిసోడ్ ల రూపంలో సమీకరించి ప్రేక్షకులకు అందించే అవకాశం కల్పించనుంది.
ప్రస్తుతం ఈ ఫీచర్ను ఎంపిక చేసిన కొంతమంది క్రియేటర్లతో పరీక్షిస్తున్నట్లు అంతర్జాతీయ టెక్ మీడియా సంస్థలను వేదికలు వెల్లడించాయి. ఒకే అంశంపై రూపొందించిన అనేక వీడియోలను వరుసగా ఒకే సిరీస్ లో వీక్షించే సౌలభ్యం ఈ ఫీచర్ ప్రత్యేకతగా నిలవనుంది. కొత్తగా రూపొందించిన రీల్స్ తో పాటు ఇప్పటికే క్రియేట్ చేసిన పాత వీడియోలను కూడా సిరీస్లలో చేర్చుకునే అవకాశం ఉండనుంది.
ఈ సౌకర్యంతో వినియోగదారులు ఒక క్రియేటర్ ప్రొఫైల్లో విడివిడిగా వెతకాల్సిన అవసరం లేకుండా ఒక రీల్ నుంచే సంబంధిత మొత్తం సిరీస్లను సులభంగా వీక్షించగలరు. దీంతో ఎపిసోడ్లు మిస్ అయ్యే అవకాశాలు కూడా తగ్గనున్నాయి. అంతేకాకుండా ఈ ఫీచర్ ద్వారా క్రియేటర్లకు కొత్త ఆదాయ మార్గాలను అందించే అవకాశాలపై కూడా మెటా పరిశీలిస్తున్నట్లు సమాచారం.
ఇప్పటికే టిక్ టాక్ లో ఇలాంటి ఫీచర్ కి మంచి ఆదరణ లభించడంతో అదే తరహా అనుభవాన్ని ఇన్స్టాగ్రామ్, ఫేస్బుక్ వినియోగదారులకు అందించేందుకు మెటా చర్యలు చేపడుతుంది. మినీ డ్రామాలు, వెబ్ సిరీస్ లు ఎపిసోడ్ కంటెంట్ వంటి ఫార్మాట్లకు ఈ ఫీచర్ మరింత ప్రోత్సాహాన్ని అందించనున్నట్లు టెక్ నిపుణులు అభిప్రాయపడుతున్నారు.
Read Warangal News and Latest Politics News and Real Estate