హైదరాబాద్: ఉమ్మడి వరంగల్ జిల్లా బీఆర్‌ఎస్ పార్టీ నేతలతో ఆ పార్టీ వర్కింగ్ ప్రెసిడెంట్ కేటీఆర్ గారు ఈరోజు కీలక సమావేశం నిర్వహించారు. తెలంగాణ భవన్‌లో జరిగిన ఈ సమీక్షా సమావేశంలో మాజీ మంత్రి ఎర్రబెల్లి దయాకర్ రావు గారితో పాటు జిల్లాకు చెందిన ముఖ్య నాయకులు పాల్గొన్నారు.
ఉమ్మడి వరంగల్ జిల్లాలో పార్టీ సభ్యత్వ నమోదు కార్యక్రమంపై కేటీఆర్ గారు సుదీర్ఘంగా చర్చించారు. ప్రతి గ్రామం మరియు వార్డు స్థాయిలో పార్టీని మరింత బలోపేతం చేయాలని నేతలకు సూచించారు.
త్వరలో జరగనున్న వరంగల్ కార్పొరేషన్ ఎన్నికలను ప్రతిష్టాత్మకంగా తీసుకోవాలని, ఈ మేరకు అనుసరించాల్సిన వ్యూహాలపై పార్టీ శ్రేణులకు దిశానిర్దేశం చేశారు.
ఉమ్మడి జిల్లాలోని అన్ని నియోజకవర్గాల్లో పార్టీ ప్రస్తుత పరిస్థితి, స్థానిక సమస్యలు మరియు ప్రజా పోరాటాలపై కేటీఆర్ సమీక్ష నిర్వహించారు. ప్రభుత్వం చేపట్టిన ‘స్పెషల్ ఇంటెన్సివ్ రివిజన్’ కార్యక్రమంలో పార్టీ కార్యకర్తలు చురుగ్గా పాల్గొనాలని పిలుపునిచ్చారు.
అర్హులైన ప్రతి ఒక్కరికీ ఓటు హక్కు కల్పించేలా చూడాలని చెప్పారు. ఓటరు జాబితాలో తప్పుల సవరణ ప్రక్రియపై ప్రత్యేక దృష్టి సారించాలని నేతలను ఆదేశించారు.
క్షేత్రస్థాయిలో పార్టీని పటిష్టం చేయడమే మన మొదటి ప్రాధాన్యత. వరంగల్ కార్పొరేషన్ ఎన్నికల్లో గులాబీ జెండా ఎగురవేయడమే లక్ష్యంగా నాయకులు, కార్యకర్తలు సమన్వయంతో పనిచేయాలి అని అన్నారు.